Nitish Kumar nem vote agütsütsü Kejriwal-i nüburtem dang mepishir

New Delhi, October 27 (Agencies): Asüng Bihar assembly election telemsa asembuba agitsü lia tanü AAP tongti lenir aser Delhi Chief Minister, Arvind Kejriwal-i Bihar nüburtem dang, tang teinyaktak Chief Minister Nitish Kumar tanaben tashii arutsü atema pa nem vote agüjang ta mepishiogo.

“Ni Bihar adianu aser aianütsürtem dang Nitish Bihar chief minister akümtsü atema vote agüjang ta mepishir,” ta Kejriwal-i twitter ajanga ashi.

Election nüboyim tenzükba mapang nungi Kejriwal-i yimjak nung Kumar maneni chief minister akümtsü atema pusemogo.

Taoba hopta Kejriwal-i, Ato kilonser Narendra Modi-i aniba BJP sorkari tamakok angutsü, ta shia liasü.

Taküm August ita nung Delhi sorkari ayongba senden ka nung Kejriwal-i, pai Bihar chief minister pusemtsü ta sangdonga liasü.  Ajisüaka Kejriwal-i JD(U) atema nüboyimba sentong nungbo shilem magi.

Assembly menden 243 nungi menden 50 bo district trok- Patna, Vaishali, Saran, Nalanda, Bhojpur aser Buxarnung nung lir, aser item district nung aliba menden atema asüng (October 28) election agitsü.

Tang tashi nung assembly menden 81 atema election agiogo.