Nitish Kumar tamakok ngudaktsüner: Manjhi

Patna, September 26 (Agencies): Taoba Bihar chief minister aser Hindustani Awam Morcha (HAM) Tir, Jitan Ram Manjhi-i, Bihar Chief Minister Nitish Kumar tamakok aludaktsütsüji tan state assembly election nung pa atema tongtibangtiba nükjidongji lir, ta ashi.
Arishi küm 70 Manjhi ya mapang ka nungbo Janata Dal-United (JD-U) lenir Kumar den tembar liasü.
October-November ita state assembly election dak sentakba nung interview ka agidang Manjhi-i, “Ni tanaben Bihar chief minister kümra ni Bihar ya model state ka kümdaktsütsü. Nitish Kumar tashi nungi atsüngindaktsütsü atema tang ni kanga meranga inyaker,” ta ashi.
2014 Lok Sabha election nung Nitish Kumar-i aniba JD-U-i tamakok mejungi anguba sülen May 2014 nung Manjhi Bihar chief minister aküm.
Ajisüaka mangatettep adoktsüsa pai mera kar agiba ajanga February 2015 nung Nitish Kumar-i pa iba menden nungi aludaktsü aser Rashtriya Janata Dal (RJD) tongti lenir Lalu Prasad teyari agia pa chief minister aküm.
Iba sülen Manjhi-i JD-U toktsür HAM party tenteta taruba election nung tokteptsü atema BJP den loktepogo.
“Ni tanaben chief minister kümra, Bihar terenlok aliba state ka kümdaktsüsangji ni asütsü ta ni kuli sayutsü,” ta Manjhi-i ashi.
“Ajisüaka tang-tangbo kü nükjidongji par (Kumar) RJD aser Congress teloktep tamakok ngudaktsüba ajanga pa tamakok aludaktsüner,” ta paisa ashi.
Manjhi ya Bihar nung Dalit kin atema tongtibang lenir ka lir.
Manjhi-i ashiba agi, Bihar nüburtemi Nitish Kumar aser Lalu Prasad naprongla agi laktetogo. “Parnoki küm 25 yimsüsüba mapang ochimashi jenti, temzüng ozüng tashi mait aser kibong kati yimsüsüba liasü,” ta pai ashi.
Tan election nung BJP aser par teloktepi assembly menden 243 nungi menden 180 nung takok angutsü, ta paisa ashi.

You must be logged in to post a comment Login