Nitish Kumar ya ashikülaker ka lir: Virendra

Patna, June 24 (Agencies): Honibarnü Rashtriya Janata Dal (RJD) lenir, Bhai Virendra-i, Bihar Chief Minister Nitish Kumar ya ashikülaker ka lir, aser Tir election nung pai taoba Lok Sabha Speaker, Meira Kumar masü saka NDA sorkari shimba candidate, Ram Nath Kovind ang pusemtsü lemtetba ajanga pai aibelen tuluka inyakogo, ta ashi.
Osangbener den jembidang Bhai Virendra-i, “Nisung ajak ashioktsür nisungtem rongnung Nitishi dena lir. Mapang ajak nung tangar ashioktsütsü atema pai meranger,” ta ashi.
“Bihar nungeri Nitish Kumar dang kodanga tai matoktsü. Tang Bihar jala ka (Kumar) Tir candidate shimogo. Nitish-i atasaba den külemi ibaji shisadangtsüla liasü. Pai aibelen tuluka inyakogo, aser iba atema pai meyipa angutsü,” ta RJD lenirisa ashi.
Hokolbarnü JD(U) lenir aser Bihar CM, Nitish-i, “Ni Meira Kumar kanga akhümtsübur, ajisüaka Bihar jalaji (Kumar) tamakok angutsü atema dang shim,” ta jembia liasü.
Bihar nung JD(U) aser Lalu Prasad-i aniba RJD teloktep sorkar lir.
Linük Tir election nung opposition party tem longjemer candidate ka shimtsü atema Nitish Kumar-i ayongmesoa liasü, aser iba dak sendakba nung pai Congress Tir, Sonia Ganshi-a ajurua liasü, ajisüaka ajungbena par party-i BJP-i shimba Kovind ang pusemtsü sangdong. Iba ya Nitish Kumar-i opposition party tem ashioktsüba ka mesüka lir.