Nitish Kumar’er telokji chichiba JD(U) lir: EC

New Delhi, November 17 (Agencies): JD(U) lenir, Sharad Yadav atema osang tamajung kaji- tanü Election Commission (EC)-i, Bihar Chief Minister, Nitish Kumar-i aniba telokji chichiba Janata Dal (United) lir, aser parnoki election maitsü ‘Arrow’ amshitsü akok, ta obendang agütsü.
JD(U) ya Bihar nung recognised state party ka lir.
Hokolbarnü Election Commission-i, “Legislature wing nung Kumar-i aniba teloki majority sayutetogo, iba den külemi JD(U) indang tongti tentet- party national council nunga majority sayutetogo,” ta oshidang agütsü.
“Anungji Nitish Kumar-i aniba Janata Dal (United) ji recognized asür. Iba denji külemi Bihar nung recognised State Party ka ama Nitish Kumar’er teloki party indang election maitsü ‘Arrow’ amshitsü akok,” ta EC-isa metetdaktsü.
Nitish Kumar-i Lalu Prasad-i aniba RJD aser Congress den teloktep sorkar raksar BJP nung adenba sülen JD(U) lenir tain, Sharad Yadav-i, Kumar-i party national executive telemtetba alema inyakba ajanga party anemba mapatem inyak, kechiyong party-i BJP anemtsü lemteta liasü, ta aija liasü.
Yadav-isa, pai aniba telokji ang chichiba JD(U) lir ta jembia aruogo. Yadav-i aniba telok nung working president, Chhotubhai Amarsang Vasava-i Election Commission dang party aser election temaitsü temeten meshia liasü saka Kumar-i aniba telok nem ang iba temeten agutsüogo.