Nitish maneni CM asütsü, Lalu-i Modi anema lungkak aittsü

Bihar assembly election nung JD(U), RJD aser Congress teloktepi takok tulu anguba sülen parnok pusemertem benjungtepa tsüngsangba noksa nung angur. (Patna, Nov. 08, 2015).

Patna, November 08 (Agencies): Deobar nü Bihar assembly election osang sangdongba sülen RJD tongti, Lalu Prasad-i, Nitish Kumar maneni Bihar chief minister asütsü aser pai Ato kilonser Narendra Modi’er ‘communal’ party anema linük tesem ajaklen lungkak aittsü, ta sangdongogo.
Bihar election nung JD(U)-RJD-Congress teloktep-i takok tulu anguba sülen Lalu-i, Modi’er sorkari maneni yimsü süra linük ya tila aika küma lokshitsü, ta ashi.
Lali Prasad-isa, “Onoki maneni raratsü. Nenoki mamangtettsüsa, Bihar election osang ajanga National yimtenren nung mapang talangka kongshitsü. Modi sorkar, RSS sorkar chireptsü. Ni milen (RJD indang election temaitsü) bener Varanasi (Modi adokba constituency)-i aotsü,” ta ashi.
RJD single largest party adokaka Prasad-i, iba takok ya party ka indang masü saka teloktep party tem takok lir, ta ashi.
“Kari onok rongnung telemsa adokdaktsütsü merangaka, onoki ibaji matalokdaktsütsü,” ta Lalu-i ashi.
Linük tesem ajaklen Modi’er sorkar anema lungkak aittsü sentong dak sentakba nung Lalu-i, “Modi’er communal sorkar tera nungi atsütoktsü atema pai aluyimertem, aayangertem aser tepetzük tia nung aliba nüburtema shilem agidaktsütsü,” ta ashi.