Nitish tenangzükba sentong nung Sonia, Kejriwal, Mamata adentsü

Patna, November 12 (Agencies): Bihar Chief Minister, Nitish Kumar asembenren atema tenangzükba agiba sentongji “linük nung opposition party tem telongjem tasen tenzükba ka asütsü” ta jembir aser iba sentong nung Congress Tir, Sonia Gandhi, Delhi Chief Minister, Arvind Kejriwal aser West Bengal Chief Minister, Mamata Banerjee nunger densema yimtenren lenir aika adentsü.

November 20 nü Bihar chief minister menden atema Nitish tenangzükba agiba sentong nungsa Congress tatong Tir, Rahul Gandhi, Uttar Pradesh Chief Minister, Akhilesh Yadav, Odisha Chief Minister, Naveen Patnaik aser Assam Chief minister, Tarun Gagoi nungera adentsü.

Iba sentong nung adentsü atema taoba mapang Ato kilonser Deve Gowda, taoba mapang Jharkhand chief minister ana- Babulal Marandi aser Hemant Soren na, Indian National Lok Dal lenir Abhay Chauthala nungera jaokogo.

Brihostibar nü JD(U) otongdar Ajay Alok-i, “Nitish Kumar tenangzükba agiba sentong nung adentsü atema onoki BJP anemer lenir ajak jaokogo,” ta metetdaktsü.

Iba sentong nung tejaoker tongtiji- RJD tongti lenir Lalu Prasad aser JD-U Tir, Sharad Yadav na asütsü.

JD-U general secretary K.C. Tayagi-i, tenangzükba agiba sentong nung BJP yimtenren anemer ajak telongjem sayutsü, ta ashi.

“Iba ya linük nung opposition telongjem tenzükba ka asütsü,” ta pai ashi.

Tan Bihar assembly election nung Secular teloktep nungi RJD-i menden 80 nung takok angu, JDU-i menden 71 aser Congress-i menden 27 nung takok ngua liasü.

Lalu Prasad’er party, RJD nungi minister 16, JDU nungi minister 15 aser Congress nungi minister 5 asütsü.