Niuland DPDB-i 2026 küm ya süntong atemba küm ta sangdongogo

Dimapur, Aenjeti/January 16 (TYO): Niuland District Planning & Development Board (DPDB) senden January 16 nü DC Conference Hall Niuland nung menogo.

Deputy Commissioner aser DPDB Niuland Vice Chairman Sara S Jamir lenisüba nung iba senden amen, aser lai 2026 küm ya süngtong atema küm asütsü ta sangdongba den, ken o dak sendaka aliba department ketdangsür dang iba sentong ya takok ngua benoka inyaktsü asoshi renemtsü mepeshia metetdaktsü.

DC-isa, district takoktem aser district nung tang benoka inyaka aliba mapatem lepa reprangshi aser officer ajak dang 2026 küm atema pei department inyakyim yanglua metetdaktsütsü mepeshia liasü.

Senden nung District Fisheries Officer (DFO), Fisheries Department, Dr, Amenla-i, taoba küm asem tashi nung Department-i district nung terenlok maparen balala benoka inyakba indang osang tejangja agütsü.

Iba dak sendakba nung DC-i, district nung ango metsüa ayoktsü asoshi lenmang sadema lapoka lir ta shia, department dang district rongsenketzüng ajungkettsütsü asoshi shishilembatsü atema tasa balala bushiyonga aotsü ayongzük. Maneni DC-i department dang ango farm ka asoshi proposal ka benoktsü aser district nung ango benjung ka ayongzüka amungtsü shidanga liasü.