Nizam museum-i auer atu

Hyderabad, Rongjui/Sept 4 (Agencies): Diamond inoker aliba hon tiffin box ka, sentilong inoker aliba marok aser auso set ka aser ruby inoker aliba spoon ka ta Hyderabad, Nizam museum nungi Tentonü auyar ogo, ta police temi metetdaktsü.
Police sangdong ajanga ashiba agi, item senti osettem ya tatembangbuba Nizam, Mir Osman Ali Khan indang liasü aser item osettem Purani Haveli nung aliba Nizam Museum nungi Tentonü anepdang züngia lia auyar ao.
Senti osettem seret 2.5 shi asütsü. Senti oset samaba jenjang kwi asütsü ajibo tejangja memetet saka sen crore 50 shi lir, ta police temisa metetdaktsü.
Auertemi süng agi yanglur aliba ventilator ka ajanga lisü amshia ki telungi ai. Ventilator anasa closed circuit television camera (CCTV) asaa meyiptsür liasü aser iba ajanga kecha record mesütet.
“Showcase indang glass raksatsü melena aurtemi kanga sangraa screw lapoker shelve nungi item osettem auyar ao,” ta Hyderabad city police commissioner P Anjani Kumar-i ashi.
Nizam Museum ya 2000 küm amenok aser idakji artifacts 450 dak tema lir, koba Nizam 7buba nem 1937 küm agütsüba lir. Iba musim nungsa tebu Mir Mahboob Ali Khan (Nizam 6buba) indang senti osettem yua lir.
Maneni museum nung Nizam indang gari; 1930 Rolls Royce ka, küm 150 tain manually operate asüba lift ka aser Nizam 6buba indang wardrobe yua lir, shiba 1930s mapang alima nung takartiba nisung liasü.
Iba museum ya Rogonü dak alaka hopta tepeyong nüburtem atema anepdang 10:00 ako nungi nikongtsütsü 5:00 ako tashi lapoka toktsür. Amungnü nüburtem senshiba sülen museum nung staff temi museum shibanger security guards pongu nem nongloka toktsür ao.
Muesum administrative officer aser Nizam Trust-i ashishiba sülen police temi ken o ka benokogo. “Auertem putettsü atema onoki dog squad aniokogo aser city police Clues team-i sample tem bendenogo. Onoki iba ken o bushisüngdangtsü atema special team 10 tentetogo,” ta commissioner-i ashi.