NJCF aser lokti tentet balala shisalen sayuba senden ka menogo

Dimapur, Aenjeti 22 (TYO): Nagaland nung lokti aser yimdenren tsütsü tang tensa nung shisalen sayuba senden ka Nagaland Joint Christian Forum (NJCF)-i jazüka Tribal Hoho aser civil society lokti balala den menogo.
Iba senden tenzüka jembiba mapang, NJCF Tir, Rev. Dr. Zelhou Keyho-i, Solution aser State Election ya arogo kübok masü, ta ashi.
“Arogo ka shilemji ‘free & fair’ election atema inyaktsüba mapa aser Tsüngrem akhumtsübuba lokti ka yangertsüba dang lir. Telemsa adoka aliba asen nüburtem kibong kati külemi anir arutsü aser asen nüburtem tsüngta kati ka dak temulung lemdaktsütsü atema inyaktsü ya arogo mapa. Anungji iba tebilemba nung NJCF ajanga iba senden ya jatep,” ta Rev. Dr. Zelhou Keyho-i ashi.
Iba senden nung adenertemi pei tangatetba aser shisatsü tajungtiba nung lemsatepa pei kisüng mejajai longjemer inyaktsü atema jembia liasü.
Naga nunger civil society tsüngta telongjem nung tashi itshitsü aser talisa nüburtem ajangzüktsü mechi iba senden nung Naga Hoho, ENPO, NTC aser NGBF nungi standing committee ka dentet.