NKVIS-i Dimapur DC nem mask 500 tenla agütsü

Dimapur, Monupii/May 15, 2020 (TYO): Brehostibarnü (14.05.2020) Nagaland Khadi and Village Industries Sangh ( NKVIS), Government of India, Secretary, Dinesh-i Dimapur, Deputy Commissioner, Anoop Kinchi IAS nem tejak nembangba mask 500 tenla agüja liasü, ta ta sangdong ka ajanga metetdaktsü.
Meti sü indang mask tem ya Rebecca Sumi-i teka agi arr, shibai 2010 küm Prime Minister’s Employment Generation Programme (PMEGP) kübok ita asem atema training agia liasü.
Iba ama tensa ka nung shilem tajung agiba asoshi Dimapur DC-i NKVIS dang pelaba metetdaktsü aser PMEGP ajanga angazükba tasatem amshia mapa küma inyakba ajitetta DC-i Rebecca nem tenüngsang agütsü.
Item mask arrtsü atema NKVIS-i Rebecca nem taa tera agütsü. Anogo ka nung lai mask 50 tashi arrtetsü ta lai ashi aser shidoka amshitetba mask ya küm ka tashi amshitettsü ta laisa ashi. Tang ama tensa ka nung, kong mask enoktsü asoshi ozüng ka ama kümogo, iba atema sen kangarabo meindoktsüsa meti sü agi arrba indang mask ya tajungtiba asütsü, ta Dinesh-i metetdaktsü.
Tang, Rebecca-i la indang unit nung mapa malir nisung 8 nem training agütsüdar aser fee atema lai parnok dang nungi taa terara agir. Iba dak alia, choir uniform arrtsü atema lai Arogo balala nungi contract agizüka inyaker, ta kasa sangdong ajanga metetdaktsüogo.