NLA election atema candidate 227 agizük; 29 magizük

Kohima, Tsüklai 8 (TYO): 13 buba Nagaland Assembly Election atema agütsüba nomination papers ajak tanü reprangdangogo aser iba mapang candidate 257-i tenüng agütsüba nungi parnok 227 indang agizükogo, ta Chief Electoral Officer, Abhijit Sinha-i ashi.
Tetsür pungu dena political party 9 aser Independent candidate 257 indang nomination papers tanü repranga liasü.
Nagaland kübok Returning Officer 53 indang office tem nung nomination paper tem reprang aser 2013 assembly election dang nungi taküm candidate 26 agi teimba lir.
Assembly Constituency 60 nungi tenüng agütsübatem rongnung parnok 29 magizük aser candidate ka indang kulikakettem Tsüklai 10, 2018 nü ang reprangdangtsü ta Additional CEO Nagaland, N. Moa Aier-i ashi.
Tenüng meyipa agitsü anogo tatembangbaji Tsüklai 12 nü asütsü, Tsüklai 27 nü polling agitsü aser Metsüremi 3 nü votes azüngtsü.
Mokokchung district kübok assembly constituency 10 nung candidate temi agütsüba kulikakettem tanü reprangdangogo aser Returning Officer tem nungi osang aruba agi nomination papers ajak shitak dang liasü.
Mokokchung town, Mangkolemba, Tuli aser Changtongya nung Returning officer temi nomination papers repranga liasü.
Mokokchung district nungi standby candidate tem dena nisung 48-i election nung tokteptsü atema tenüng agütsü aser tenüng agütsürtem rongnung 21 Tuli AC aser 24 Angetyongpang AC liasü. Iba constituency anaprong nungi candidate 8 liasü.
Deputy Commissioner & District Election Officer, Kohima, Rajesh Soundararajan IAS-ia sangdong ka nung Kohima district kübok aliba Assembly Constituency ajak nung nomination papers reprangogo ta metetdaktsü.