NLA-i 2017-18 atema budget sen crore 16375.42 agizükogo

Kohima, March 30 (TYO): Tanü Brihostibarnü Nagaland Legislative Assembly (NLA)-i 2017-18 atema State budget sen crore 16375.42 agizüka yuogo.
Nagaland Chief Minister, Dr. Shurhozelie Liezietsu-i March 28 nü taoba küm state budget sen crore 1437.84 sentsüh nung tembangba metetdaktsüdang opposition maliba NPF-i aniba DAN MLA temi tasüngdangba kecha makai agizüka ayu.
Dr Liezietsu-i, tan benokba budget nungi March 2018 nung sen crore 220 anüngtsü imlar, ajisüaka 2016-17 bo sen crore 1657.87 sentsüh nung tembangtsü, anungji kodang ongko inyakdir 2017-18 budget ji sen crore 1437.84 sentsüh nung tembangtsü, ta ashi.
2017-18 atema budget ji 2016-17 küm benokba sen crore 13,658.74 dang nungi sen 2716.68 agi tali benoka lir.
Iba budget ya Nagaland Appropriation (No.2) Bill, 2017 authorising payment ajanga benok aser sen 16375,42,000 ji Consolidated Fund of the State of Nagaland nungi March 31, 2018 tashi atema agiteta ayuba lir.
12buba NLA, session 15buba aser tatembangba senden nung March 27, 2017 nü asür aser tesüiba mapang Interim Board nung züngsem, Hepong Phom abilemteta asüko lemsatep.
Senden nungsa ano Consolidated Fund of the State of Nagaland nungi March 31, 2017 tashi nung intokba sen crore 3403.76 menokba nung yaritsü asoshi Nagaland Appropriation (No. 1) Bill, 2017 dena agizükogo.
Iba bill Chief Minister Dr. Shurhozelie Liezietsu-i metetdaktsüdang loktii ola adoka agizüka ayu.
Speaker, Imtiwapang Aier-i 12buba NLA, session 15buba tembanga 2017-18 atema latetba financial aser non-financial committee aser mendenpurtem tenüng metetdaktsü.