NLA-i 2018-19 atema sen crore 18315.76 budget agizük

Kohima, Metsüremi (March) 27 (TYO): 13 buba Nagaland Legislative Assembly (NLA)-i 2018-19 financial year atema sen crore 18315.76 budget agizükogo.
Tentonü (Hombar) budget session tatembangba anogo nung ghonda 12 tashi senden amen. Anepdang 9:30 ako nungi aonung 9:30 ako tashi senden amen aser idangji Opposition MLA temi benokba onük kar atema olemtepba sülen voice vote ajanga 2018-19 Budget agizük.
Nagaland Chief Minister Neiphiu Rio-i Metsüremi (March) 23 nü assembly nung budget benoka liasü. Iba ya Nationalist Democratic Progressive Party (NDPP)i aniba People’s Democratic Alliance of Nagaland (PDA) sorkar indang mezüngbuba budget lir.
Assembly nungsa Nagaland Road Safety Authority Act, 2013 (First Amendment) Bill, 2018 aser Nagaland Appropriation Bill (No.1) 2018 agizüka ayu. Mezüngbuba bill ji Transport Minister, P Paiwang Konyak-i benok aser taanbubaji Neiphiu Rio-i benokba liasü.
2018-19 indang Budget atema olemtepdang Opposition MLA, Imkong L Imchen-i linük kübok tesem balala nung Khristantem reshikangshiba atema BJP dak tai tonglokja jembi.
Iba tashiyim mapa ya RSS ajanga inyaker aser parnok indang yimtenren kongsangji BJP lir anungji BJP-ia shilem agiba ama lir, ta Imkong-i ashi.
Chief Secretary’s Welfare Fund atema sorkar mapa inyakertem nungi sen agiba atema paisa sorkar aija jembidang, Administrative Head of Departments aser Head of Departments senden nung sorkar mapa inyaker ajak nungi masü saka gazetted officers temulungertemi dang tenlatsü atema jembi, ta ashi.
Iba ya Cabinet indang telemtetba ka masü anungji AHoDs aser HoDs-i iba ama saru sarutsü atema tashi agüja lir asü? ta Imkong-isa asüngdang.
MLA Chotisuh Sazo-ia Metsüremi (March) 21 nü Chief Minister-i MLA 20 Advisor inyaktsü shimba indang osang tejangja metetnüa asüngdang.
Sazo-isa Imkong yarisema, Centre nung BJP sorkar akümba sülen Khristantem anema inyakba tali bulua aküm ta ashi.
Centre nung BJP sorkar akümba sülen Christmas Day nung Good Governance Day aser Good Friday nung Digital India Day amungtsü telemtetba agi. Taoba sorkari item onük atema ola adok aser Centre dangi shidi zülua liasü, ta paisa metetdaktsü.
PDA sorkar akümba sülen Zunheboto aser Dimapur nung lendong asem atalokba ajanga law & order tsütsü temelenshi arudar ta asüba yimyim jungkai adoka sayuogo, ta Sazo-isa shisem.
MLA C L John-i jembidang, “Chief Minister-i Eastern Nagaland atema balaka temulung agüja inyaktsü ta jembiba pela agizüker saka Rio lenisüba kübok DAN-II sorkari Eastern Nagaland asoshi sen crore 300 special package agütsütsü ta nangzük, ajisüaka tanü tashi ibaji mapa küma meinyak lir” ta ashi.
Rio-i maneni Chief minister inyaktsü mapang aruba ajanga pai senji agütsütsü aser ibaji talisa Eastern Nagaland district tem nung gari lenmang yangluba nung amshitsü imlar, ta John-i ashi.
Sorkari agri & allied sector aser organic farming ajungkettsü atema jembir saka Budget nung iba atema sen peria enoka mali ta Opposition-isa metetdaktsü.
NPF MLA tem- Yitachu, EE Pangteang, Y Vikheho Swu, Ngangshi K Ao aser Dr Imtiwapang Aier nungertemi sorkari nangzükba ama mapa inyaka aotsü imlar ta ashi.
Sorkar tenüng nung o jembidang, Minister G Kaito Aye-i “MLA temi state adena orr tashiyim mapa inyakbatem masü saka Nagaland nung alirtem dak sendakba onüktem atema ang mapang endoktsüla” ta ashi.
Budget 2017-18 yasa tajungtiba ta Kaito Aye aser MLA Namri Nchang nati ashi.
MLA K T Sukhalu-ia Budget pusema jembidang School Education department nung temelenshi bener arutsü atema züngsem ajaki yariteptsü mepishir ta ayongzük.
Taoba DAN sorkari nübortemi aginüba ama metongtsü kechiyong NPF party sasep nung menden raktepba ajanga mapa takok ngua meinyaktet, saka tang Neiphiu Rio lenisüba kübok PDA sorkari kechisarena ajaklen temelenshi bener arutsü aser state tejakleni anitsü, ta Minister Jacob Zhimomi-ia ashi.