NLA nung ‘Question hour’ meyipa aruogo; Gondha 6 jungnüa senden amen

Kohima, March 23 (TYO) : 12 buba Nagaland Legislative Assembly (NLA) session terpungububa tenzüker anogo anabuba nung Indo-Naga yimten ken o aser tawa Myanmar sorkari Indo-Myanmar arrtsü atsüdangba indang onüktem benoka olemtepogo.
May 2015 nung Nagaland nung opposition maliba sorkar ka kümtetba sülen, tang mezüng atema ‘question hour’ nung MLA temi kanga yakyaka shilem agia liasü.
Tanü session ji gondha 6 jungnüa agi aser iba ya opposition maliba NPF-i aniba DAN sorkar atema session talangtiba agiba asütsü.
Senden nung Minister aser Parliamentary Secretary temi 2016 nungi 2017 indang annual administrative report tem benoka liasü.
NLA Commissioner aser Secretary, N Benjamin Newmai-i The Nagaland Municipal (Third) Amendment Bill, 2016 aser St. Joseph University (Nagaland) Bill, 2016 atema Nagaland Angh-i mulunga agizükba shidi senden nung benok.
Angh indang onük atema ‘motion of thanks’ agidang, Rural Development & REPA Minister, C L John-i, NPF sorkar atema tongtipangtiba onükji Naga yimten ken o atema telemtetba ka agitsü atema lir saka Naga nunger tanga yimten telok ajak dena, iba ken o dak sendaka alirtem ajak dendaktsütsü asoshi inyaktsüla, ta metetdaktsü.
Iba atema sorkari tentetba Political Affairs Mission ajanga mapa inyaktsüla, ta paisa shisem.
Naga lanurtem zünger mapa mangur aser iba ajanga asen state nung zünger mapa manguba khuret tuluba akümer. Anungji, iba atema sorkari quality education dak dang merangloki practical education den külemi lokteper mapa inyaktsüla. Ibaji ajanga lanurtem dak skill renloktsü, ta John-isa metetdaktsü.
ULB election nung tetsür nem shilem lemzüktsüba atema olen ka jembidang, CL John-isa ashiba agi, Arrla 371(A) nung lateta aliba nung ajemdaker state sorkari Nagaland nungbo Linük Temzüng nung 74th Amendment meinyaktsü atema mepishitsüla.
Senden nung School Education & SCERT Minister, Yitachu-i Nagaland nung Urban Local Bodies indang elections ajanga tensa mejungi akümba atema ashiba agi, Nagaland ya Linük Temzüng nung Arrla 371(A) ajanga tentetba state ka lir.
Iba Arrla ajanga Naga yimten tebilemtsü atema telemtetba magütsür saka Naga nunger nem tashi balaka agütsür. Arrla 371(A) ajanga Naga nunger nem linük ka sasep nung linük ka agütsür, ta paisa ashi.
Jenjang temaba ka nung ozüng mapa inyaktsübaji state sorkar aser jenjang tajemba nung inyaktsübaji village council aser rejutem lir. Sorkari urban area nung ozüng dak sendakba mapa inyaktsü atema tentet ka nüngdaker, saka sorkari tajung atema bilema inyakba nung tai apu aser aibelena angatet. Iba onük atema sorkari sendaktepa alir ajak külemi sabang ka nung tangatetba lemsatepba jaokba ama nisung ajaki mulungsoa shilem agitsü imlar, ta Yitachu-isa metetdaktsü.
Senden nung MLA P. Pohwang Konyak-ia, state sorkari NSCN(K) dang India sorkar den Cease Fire alitsü atema mepishiba pela agizükba metetdaktsü.
Sorkari o aser shiditem ajanga mepishiba dang masü saka Khaplang den ajurutepa ceasefire alitsü mepishitsü atema luden ka tentettsüla, ta paisa shisem.
Housing Parliamentary Secretary, Levi Rengma-ia infrastructure development sector indang osang metetdaktsüdang, New Delhi kübok RK Puram nung Nagaland House yangluba mapa tatembangleni arudar aser kobi melii semzüktsü, ta ashi.
Külen, Justice & Law and SIRD Parliamentary Secretary-ia sorkar dang December 2007 nung Cabinet telemtetba ama Zunheboto district nung aliba Khelhoshe Government Polytechnic, Atoizu Degree Civil Engineer College jenjang nung ajungkettsü atema mepishia metetdaktsü.
Senden nung MLA Mmhonlumo Kikon-i o jembidang, ketdangsübaren nung tashishitsü melii inyaka otettsü atema sorkar department ajak nung Personal Information Management System (PIMS) tajungba küma yanglushitsü ayongzük.
Maneni, State Planning Board Deputy Chairman, Kuzholuzo Azo Nienu-ia tawa nübortemi ULB elections atema ola adokbaji khuret talila bendenlokba ka lir ta ashi.
2006 nungi sorkari NGO tem dak temulung kanga agütsüba aser opposition maliba sorkar ka asüba ajanga iba khuret ya ajuru, kechiyong NGO temi opposition ama shilem agir. Asenoki ajaki iba khuret atema tebilemtsü abentsüla, ta Azo-isa ashi.
Paisa, sorkar dang Vision 2030 ya tanga tezülubatem ama kinük nung meyui, süoki ia bilema mapa inyaktsü atema ayongzüka liasü.
Azo-isa Nagaland nung zünger mapa manguba khuret atema olen ka ashidang, sorkari lanurtem private sectors aser entrepreneurship atema ajungmesotsüla, ta metetdaktsü.
Maneni asünga Angh indang onük nung o lemtepba mapang alitsü.)