NLA nung tatartemi Naga yimten onük nung pangzüng 5 renem

Kohima, Jul 27 (TYO) : Nagaland Legislative Assembly (NLA) nung tanü Hombar nü adenshir tatar senden aliba mapang tatartemi Naga yimten tebilemtsü onük nung pangzüng 5 renemogo.
Tan amenba tatar senden nung Naga yimten onük nung anogo ana July 23 & 24 nung tatartem ajaki shilem agia ken o lemtepba sülen, senden nung adener ajaki mulunga tamalen kasa onük nung December 12, 1964, August 28, 1970, September 16, 1994 aser December 18, 2003 nung pangzüng azüngba ken o renemshia ayu.
Iba ken o nung Naga nunger lushi tangtepba aliba (contiguous Naga inhabited areas) ajak yimten ka küboki aittettsüsa India sorkar dang ashitsü lemtet.
Tatar senden ajangasa India sokar o NSCN(K) na dang Naga yimten tebilemtsü ken o ya yimjung nung jembia timi latettettsü asoshi parnok tsüngda tanaben yimjung lapoktsü atema mepishitsü latet.
Tatartemisa Nagaland nungi Armed Forces (Special Powers) Act 1958 kübok Nagaland ajunga ‘Disturbed Area” kümdaktsüba telemtetbaji meyipa agitsü center sorkar dang ashitsü lemtetogo.
Tatar senden nungsa tatartemi Naga nunger linük tenzükertem aser lokti tentet balala ajak dang longjemer Naga yimten telatetba kati arutettsüsa inyaktsü mepishia metetdaktsü.
Nagaland tatar senden nung tatartemi India sorkar dang Naga yimten tebilemtsü ken o ya rema meyui tekaratiba nung telatetba kati arutettsüsa inyaktsü atema temepishiba ken o ka agütsüogo.