NLCF-i tenüngsang agütsüba sentong agi

Dimapur, Rongchii (April) 15 (TYO): Rongchii (April) 15, 2018 nü Nagaland Legislators Christian Fellowship indang tenüngsang agütsüba sentong ka ayonga agi.
Sentong nung Chief Minister, Neiphiu Rio-i o jembidang, “Tsüngrem aser Nagaland nung alirtemi asenok nem maongka tulu agütsüogo anungji asenoki (MLA) Tsüngrem aser nübortem asoshi teinyaktsü khuret aika lir” ta ashi.
“Asenoki (MLA) mapa shitak inyaktsü atema Tsüngremi len anitsü aser tangatetba agütsütsü imlar. Onokia loktiliba tajungba kümdaktsütsü atema nübortem tenzüktsü nangzüker” ta Rio-isa ashi.
Nagaland Legislative Assembly nung MLA tem dang masü saka sorkar ketdangsertem, kin hohotem, civil society tem aser arogotemi onok nungita yaritsü atema ayongzüker. Onoki nübortem dang nangzükbatem mapa küma inyaktsü atema onok yaritsü mepishir, ta paisa metetdaktsü.
“Asenok ajemaludi aser Tsüngrem den tesentaktep yur, Pa lenisüba kübok mapatem inyaka odi” ta chief minister-isa ayongzük.
“MLA ajak ya nükjidong tulu yur shimtetba lir, anungji nenok tsüngda kati ka agizüktettsüla aser timi mapa inyaktsüla,” ta Rev Rachulie Vihienuo-i o jembidang ashi.
Khrista atema mapa inyakertem atema, asenoki asen taküm nung Yisu Khrista ajanga agütsüba tangatetba, teinyaktsü aser telatetba kübok anidaktsüla, ta paisa ashi.
MLA tasentem dak Nagaland nung alirtemi teimla tulu lir aser nübortemi aginüba ama asenok putu tasen ka nung ajemokogo ta bilemer, ta Rev Vihienuo-isa shisem.
Sentong nung State Chaplin, Rev Kuzierang Thou menden liasü, Minister CM Chang-i temoatsü meshia sarasadem, Minister Paiwang Konyak-i Lai azüng aser MLA tem kinungtsü aser chirnurtemi aser Ameu o lar Choir nungertemi ken atenba ajanga shilem agi.