NLD teloki Myanmar election nung shilem agitsü: Suu Kyi

Myanmar opposition lenila, Aung San Suu Kyi (Tiyongtsü)-i lar kidang, Naypyitaw yimti nung osangbener den tanü Honibar nü ajurutepba noksa ka yangi angur. (Naypyitaw, July 11)

 

Yangon, July 11 (Agencies): National League for Democracy (NLD) yimtenren teloki taküm November ita agitsü ayongba national election sentong nung shilem agitsü renemba osang ka Myanmar opposition lenila, Aung San Suu Kyi-i tanü Honibar nü metetdaktsüogo.

Lai aniba NLD teloki taküm agitsü ayongba election nunga shilem magitsü akok ta aikati bilemba agienja Suu Kyi-i tanü iba osangji sangoktsü.

Myanmar-i taküm November ita 8 nü agitsü ayongba parliamentary election ya küm 25 tsüngda nung par linüki tan mezüngsüa ajak nem tetsükdakba kecha majurudaktsüi election agitsü ayonger lir.

“Asen Myanmar linüki democracy inyakyim den sentakba temelenshi maneni agitsü lenmang sadema lapoktsütsü nükjidong nung ozü NLD telokia tan ayongba election nung shilem agitsü renemogo,” ta Nobel sempet agizüker, Suu Kyi-i tanü metetdaktsü.

“Ozü NLD teloki tan election nung takok ngura, Myanmar nung alir ajunga sentaktepshitsütsüji ozü telok indang mezüng teinyaktsü asütsü. Linük ka rendaktsütsü asoshi yimtenren, rongsenren aser iba amala sabang ajunga indang tensa junga alitsüji kanga dang tongtipang. Aji oda, NLD teloki Myanmar sorkar tentettsü maongka ngutetra, ozü teloki Myanmar tejakleni bener aotsü nangzüker,” ta Suu Kyi-i tanü Naypyitaw yimtiba nung osangbener den ajurutepdang sangoktsü.

Taoba mapang, 1990 nung agiba Myanmar election nunga lar NLD teloki takok tulu nuga liasü saka iba mapang nung Myanmar indang yimsüsütsü tashi bena alir, mitkartemi election nung takok angubaji magizüker ta shia, NLD teloki takok angubaji amajok kümdakja liasü.

Yamaji atalokba sülen NLD teloki 2010 küm agiba election sentong nung shilem magi oda süidaktsü.

Ano külen, taküm agitsü ayongba election nung mitkar aser sorkar lenirtemi amokbangba yimtenren telok, Union Solidarity & Development Party (USDP)  NLD telok anema tokteper tesashiba telok alitsü.

Ajisüaka, Myanmar parliament aser regional chamber menden balala kümsük 5 asoshi abentsü asoshi tan ayongba election nung NLD teloki takok tulu angutsü ta tamangba tulu yua lir.

Tan agiba election nung takok angurtemi parliament menden 4 shilem nung shilem 3 benoktsü aser tanüngba shilem 1-ji mitkartemi mekazüka yua lir.

Tesülen, tan election nung takok ngua parliament upper aser lower house nung züngsemba yimsüsürtemi Myanmar Tir tasenba shimtettsü.

Tia makatsüsa, linük temzüngi memelaba yong Suu Kyi-ibo Myanmar Tir menden atema candidate ka ama election nung metokteptettsüsa tang tia ajurua lir.