NLD teloki Myanmar Tir menden atema U Htin Kyaw shimer

Myanmar nung democracy lenila, Aung San Suu Kyi-i aniba National League for Democracy (NLD) yimtenren teloki parliament lower house nungi Tir menden asoshi candidate ka ama toktepdaktsütsü asoshi shimsang, NLD kübok Central Executive Committee züngsem, U Htin Kyaw-i Naypyitaw nung tentetba parliament ki tonga aodang agiba noksa ka yangi angur. (Naypyitaw, March 10)

 Naypyitaw, March 10 (Agencies): Myanmar nung democracy yimsüsütsü yimya benoktsü asoshi tasü ita nokdakla, Aung San Suu Kyi-i aniba National League for Democracy (NLD) yimtenren telok nungi Myanmar Tir menden asoshi candidate ama toktepdaktsütsü atema Suu Kyi-i temulung achiba yimsüsür, U Htin Kyaw tanü, Brehostibar nü shimogo.

Yaküm, 2015 küm November ita agiba parliamentary election nung NLD teloki parliament menden timba ajangzüka aliba yong Kyaw-i Tir election nung vote timba ngua mitkartemi 1962 küm nungi tenzüka yimsüsütsü tashi benokba sülen tan mezüngsüa democracy yimsüsü yimya benshia shimba mezüngbuba Myanmar Tir akümtsü jenjang angutsüsa tang jenjang tajung ngua lir.

Linük temzüngi memelaba yong Suu Kyi-i Myanmar Tir menden abentsü temeten monguteti lir.

Aji oda, par NLD teloki Suu Kyi melena yimsüsür shiba Tir menden atema candidate ama toktepdaktsütsü ta alimai ita 4 tashi yongyaseta ataba sülen par teloki par Tir candidate tenüng tanü alima dang metetdaktsür lir.

Kyaw-i Suu Kyi-i tentetba nübur yaridak ketdang asüba den külemi, Suu Kyi amenba gari anishia 1990s mapang nungi tenzüka Suu Kyi den tesendaktep junga aliba yimsüsür ka lir.

Myanmar parliament lower house, upper house aser mitkar lenirtem nungi candidate kaka shima, par asemi toktepba sülen vote timba anguri Myanmar Tir tasenba akümtsü temeten angutsü.

NLD teloki upper house nungia par züngsem, Henry Vantriu Tir menden asoshi candidate ama toktepdaktsütsü shimba osang jangjaogo.

Ajisüaka, par teloki Vantriu nem Tatong Tir menden ang bendaktsütsü sentong renemba osanga angazükogo.

Ano külen, nüburtemi aginüba ama, lai Myanmar Tir menden abentsü temeten mongutetba atema taidok meshiba olen ka Suu Kyi-ia tanü metetdaktsüogo.

Lai tan nübur mangdang asangsang nung matalokdaktsütet aka lai Tir menden abentsü temeten mongutettsüsa ajuruba tenokdangbaren yimjung sentongtem ajanga tarutsü mapang agientsü tenangzükba olen ka Suu Kyi-isa metetdakja liasü.

Myanmar yimsüsürtemi tan hopta tatemlen tashi nung election agia par Tir tasenba shimba sülen Tir tasenbai taruba April ita 1 nü nungi tenzüka par linük lenitsü alizüng yua lir.