NLD yimsüsürtemi 1 buba parliament senden nung shilem agir

NLD yimsüsürtemi 1 buba parliament senden nung shilem agir

Myanmar nung tentetba National League for Democracy (NLD) yimtenren telok lenila, Aung San Suu Kyi-i tasenba parliament senden nung shilem agitsü asoshi parliament ki tonga aoba noksa nung angur. (Naypyitaw, February 01)

 Naypyitaw, February 01 (Agencies): Myanmar nung democracy yimsüsütsü yimya benoktsü asoshi nokdakla, Aung San Suu Kyi-i aniba National League for Democracy (NLD) yimsüsür noklang aikati tenangzükba agiba sülen tan mezüngsüa Myanmar parliament senden nung tanü, Hombar nü shilem agiogo.

1962 nungi tenzüka mitkartemi yimsüsütsü tashi tashiyim agi benokba sülen tan mezüngsüa democracy yimtsütsü yimya benshia yaküm, 2015 küm November ita agiba election nung NLD teloki parliament menden noklang nung shilem 80 tashi ajangzüka par telok kijai Myanmar sorkar tasenba tentettsüsüa tashi angu.

Ajisüaka, mitkartemi latetba linük temzüngi mitkar lenirtem nem parliament menden noklang nung shilem 25 tashi agütsü aser security minister 3 tashi mitkar lenirtem rong nungi shimtsü latetja aliba yong NLD teloki mitkartem den aroki lungjemer par Myanmar linük madak yimsü asütsüsüa tang jenjang ajurua lir.

Tanü parlimant lower house senden nung shilem agirtemi par chairman asütsü asoshi NLD kübok Central Executive Committee züngsem, Win Myint shim aser deputy chairman inyaktsü asoshi Tir Thein Sein-i aniba yimtenren telok züngsem, T Khun Myat shima liasü.

“Küm aika lir külen nüburtemi vote agüja shimba yimsüsürtemi tanü mezüngbuba parliament senden amener. Myanmar linüki democracy yimsüsütsü yimya benoka temelenshi tasen agitsüren nung tanü ya tongtipang anogo ka lir. Asen linük aser nüburtem nem tajangzük bener arutsütsü asoshi yimsüsür ajungai amalitepa yimsü asü ajungshir,” ta Myint-ia tayongzükba olen ka metetdaktsü.

NLD teloki amokbangba parliament yimsüsürtemi Myanmar linük Tir tasenba taküm April ita shimba sülen par NLD teloki tentetba sorkar tasenbai Myanmar madak April ita nungi yimsü asütsü sentong renema lir.

Ajisüaka, Suu Kyi-i lar NLD yimsüsürtem rong nungi Tir menden aser tongti minister menden bendaktsütsü asoshi shirnok shimtsü iba osang tanü tashi memetetdaktsüi lir.

Bendanger den kibong akümer mesüra pei chirnuri bendang senso agia alirtem nem Myanmar Tir menden abentsü temeten magütsütsü asoshi linük temzüng nung lateta aliba yong Britain nunger ka den kibong akümba den külemi, jabaso anapronglai Britain senso agia alila, Suu Kyi-i election nung takok nguaka, lai Myanmar Tir menden abentsü temeten monguteti lir.

You must be logged in to post a comment Login