NLF bangzüngji Naga nunger temetetertem mezüngmeshiba lir: NPCC

Kohima, June 16 (TYO): MLA 60 prongla dena aliba Nagaland Legislators Forum (NLF) ya nüburtem aser Nagaland litsü atema lir, parnoki nüburtem dang sayutsü atema dang lepshia bangzüngtem yangluba ya anentsüla, ta NPCC Tir, K. Therie-i tanü sangdong ka ajanga ashi.
“Parnoki  State Assembly nung shimtetba züngsem ka asüba jenjangji metettsüla. Tawa parnoki kasa bangzüng ajanga India sorkar, Naga yimtenren teloktem aser FNR dang temepishibatem benoka liasü. Bangzüngtemji sentongtem aser temepishibatem dang lir. Parnoki kidangser state tem aser linük matsüngdang Naga nunger temetetertem maksütsüba anentsüla,” ta sangdong nung shia lir.
“Tawa Angh-i jembiba o ajanga parnok melungjang nung mekongshi. Pai (Angh) MLA züngsemtemji bangzüng yanglutsü saka meinyaktsü atema shimba dang masü ta ashi,” ta kasa sangdong nung shia lir.
“Nüburtem senpong nungi yaküm MLA 60 Delhi-ia ao. Tajangzük makai parnok kwiben ainlen senzütsü (?) Ano ainlen senzübaji mapang intokba aser nüburtem saru sen amajok nung intokba dang asütsü,” ta NPCC Tirisa ashi.
Ken o 70 ben dak tali jembiaka stake holders teimba kati agizüktettsüsa India sorkar aser ken o jembir telok nati telatetba ka bener marutetbaji state-i meteta lir.
“Simon Commission dangi Naga Memorandum agütsübaji miim mapa ka masü. 9-Point Agreement ji miim mapa ka masü, Plebiscite ji ladaka agi. 16-Point Agreement ji ladaka agi. Revolutionary Government Agreement ladaka agi. Shillong Accord ladaka agi. Itemji Nagaland nunger lenirtemi renem. India sorkar aser nüburtem matsüngdang item onüktem nung parnoki khuret agi. Ibayongji asen state jenjang nung Arrla 371A lir,” ta kasa sangdong nungsa shia lir.
“State Assembly-i nendaka inyaker süra aser tasütait süra parnoki Naga nungertemi aginüba ama onüktemji benoktsüla aser tesüiba mapang asen lenirtemi inyakba ama India sorkar den jembitsüla,” ta sangdong nung shia lir.
“Nagaland MLA tem tashimait malitsüla. Tamalen asen lenirtem tashimiti maliasü. Parnok aikati taküm bendanga agütsü, ajisüaka Naga nunger puti otsü nung parnok taküm lir. Tsüngremer taochi nung parnok karbo asenok tenzüktsüsa liogo aser iba atemaji parnok dang asen sentsüh lir. Asenoki parnok nükshir, aser asenoki asen lenirtem tanela nungi tashi angutsü aser asen nüburtem aser adianutemi imlaba ama litettsü,” ta NPCC sangdong nungsa shia lir.