NLFT-i Yimjung Tenangzüktep agitsü akok: Tripura CM

Agartala, August 22 (Agencies): India sorkar aser NSCN (IM) na tsüngda Yimjung Tezüngzüktep agiba sülen ano northeast India nung telungpur telok, National Liberation Front of Tripura (NLFT)-i prangpong-injang toktsür sorkar den Yimjung Tenangzüktep agitsüa akok, ta Honibar nü Tripura Chief Minister Manik Sarkar-i ashi.
Osangbenertem den jembidang Sarkar-i, “Tesüiba ita trok tsüngda Delhi aser Shillong na nung Union home ministry ketdangsertem, Central Intelligence tentettem aser Tripura sorkari NLFT den anaben tashi ken o jembiogo,” ta ashi.
“NLFT den maneni ken o jembitsü asoshi onoki mulunga dang lir. Ajisüaka parnoki latetbatem, takhangbatem aser onüktemji ano sorkar nem magütsüi lir. India Temzüng kübok onoki NLFT den onük mashi ka nung ken o jembitsü mulunga dang lir,” ta state nung Home potfolio densema abensang Sarkar-i ashi.
Chief minister-i ashiba agi, kidanger linük Bangladesh nung NLFT tesep tajemba agi 16 lir aser par züngsem 80 shi den raraba oset tajung noklang ka shi lir.
“Bangadesh bank balala nung NLFT account lapoka lir,” ta paisa ashi.
Osang ka ajanga angashiba agi, sorkar den Yimjung ken o jembiba nung taoba Tripura National Volunteers (TNV) tongti, Bijoy Kumar Hrangkhawl aser taoba Mizoram chief minister Zoramthanga na dendaktsütsü atema tawa NLFT-i Union Home ministry ketdangsertem ajuruogo.
Iba dak sendakba nung tasüngdangba ka langzüdang Sarkar-i, “Hrangkhawl ji telungpur telok denji tesentaktep lir ta onoki jembia aruogo, aser NLFT-i MHA (home ministry) dang mepishibaji ajanga tang kuli sayur. Hrangkhawl ji telungpur telok denji tesentaktep mali asünungbo, kechiba ken o jembiba nung pa dendaktsütsü atema NLFT-i benoktsü (?) NLFT-i iba ya benokba ajanga, Hrangkhawl-i telungpur telok dangji pa parnok den densema liasü ta osang agütsütsü meranger,” ta ashi.
Küm 17 dak tema Tripura chief minister inyaksang Sarkar-isa, tesüiba küm ana tsüngda state nung telungpur tatalokba 12 liasü, aser item tatalokba nung nisung pezü tepset, ana yiruogo aser nisung 18 puogo, ta ashi.
“Taküm tang tashi nungbo telungpur dak sentakba tatalokba mali. Tawa telungpur aikati sorkar matsüngdangi aruogo,” ta paisa ashi.
1997 küm Union Home ministry-i NLFT aser All Tripura Tiger Force (ATTF) telok na nokdanga liasü. Parnoki Tripura ya India nungi pilatsü akhanger, ajisüaka ATTF züngsem aikati sorkar matsüngdagi aruogo aser tangbo iba telok ya mali den kasa kümogo.