NLFT(SD) züngsem 88-i CM Deb tsüngdang temai adok

National Liberation Front of Tripura (SD) züngsem kati Tripura Chief Minister Biplab Kumar Deb nem prangpong agütsüdang agiba noksa angur. (Agartala, August 13)

Agartala, August 13 (Agencies): National Liberation Front of Tripura (NLFT) züngsem 88 tashi tanü Tripura chief minister Biplab Kumar Deb tsüngdang temai adokogo.
Sabir Kumar Debbarma-i anir NLFT züngsemtemi Ambasa nung aliba Chandraipara Higher Secondary School ground nung temai adok.
Parnoki prangpong-injangtem bener arua chief minister Deb tsüngdang agütsü.
Centre sorkari taoba Hokolbarnü NLFT (SD) den memorandum of settlement nung sign asü.
Tripura nung lisopur telok kati lenmang taileni ao aser tali bilemloka oa inyak saka Prime Minister Narendra Modi indang ‘Sabka sath, Sabka Bikash, Sabka Biswa’ yimyim ajanga parnok ajungmesoa temai adokogo, ta chief minister Deb-i tanü ashi.
BJP sorkari Tripura nung lisopurtem taküm jenjang tajungba kümdaktsütsü atema meranger, ta paisa ashi.
State sorkari lisopurtem alidak road connectivity renlokdaktsütsü atema Rs 1600 crore lemzüktsüogo, ta Deb-isa shisem.
Taoba sorkari state nung lisopurtem renlokdaktsütsü atema kecha meinyak ta chief minister-isa tai tongloktsü.
2005 nungi 2015 tashi NLFT-i ozüng alema mapa 317 inyakdang security forces 28 aser civilian 62 tashi taküm sama.
2015 nungi NLFT den yimjung olemtep tenzük aser 2016 nungibo parnoki ozüng alema mapa inyakba mali.
Tanü agiba sentong nung Deputy chief minister Jishnu Devbarman aser MP Rebati Tripura na aden.