NLSF ajanga Principal Secretary to CM ajuru

Dimapur, Tsüklai/February 04 (TYO): Nagaland Law Students’ Federation (NLSF) den parnok indang tribunals aser advisor tem lungjemer Principal Secretary to Chief Minister aser Chief Minister indang office nung ketdangsürtem den February 3, 2022 nü senden ka mena liasü.

Iba mapang NLSF ajanga state nung legal education aser legal system tajung alitsü kanga tongtipang, ta ashi aser state nungi tzüzüng-zoüng meteter tejangja aika adoktsü imlaba lemsatepa liasü, kechiaser Naga nunger dak sempet tajung lir.

Ajidang masü parnoki state nung Govt./Public Law College temeja ka nüngdak, ta ashi.

Federation ajanga Representation, Memorandum agüja aser yimjung nung longkak aita liasü, saka ketdangsürtemi tang tashi itemji süoki ia magizüker, ta parnoki ashi.

Item nüngdakbatem kecha anepalu mesütsüba atema NLSF ajanga state nung ketdangsür balala ajurua jajaogo, ta ashi.

State aser talisa Law Student tem ajungtsü mechi tekeratiba nung Govt./Public Law College ka amenoktsüla, ta NLSF ajanga tezüluba nung Chief Minister nem Principal Secretary to Chief Minister ajanga agütsü.

Iba tezüluba ya Minister, Planning and Co-ordination & Land Revenue aser Minister, Higher Education & Tribal Affairs dangia yokogo.