NLSF-i apuani tepsetba aitsür

Dimapur, February 9 (TYO) : February 6, 2016 nü Shamator aser Kiphire tsüngda apuani ka tepsetba tatalokba kukua aitsür aser tasür kibong den asüku lemsateper, ta Nagaland Law Students’ Federation (NLSF)-i sangdong ka nung metetdaktsü.
Ozüng amertem aser bushisüngdangertemi tekaratiba nung aibelenertem pua ozüng tapet agi merenshitsü mepishir, ta NLSF Tatong Tir, Wekhrope Marhu aser Tongti Tezülur, Khemvu Mekru nati sangdong nung shia lir.
Asen linük reprangdangra, Nagaland ya ‘nisung ayongayonga tepsettetba state’ ka kümogo aser iba jagi ozüng akhümtsüburtem kong lir aser shirnoki nisung takümtem kümzüka ayutsü ta tasüngdangba arur, ta NLSF-isa sangdong nung metetdaktsü.
Nagaland nung kanga tetshiba tatalokbaji December 14, 2015 nü tetsür shishilembar Ritika Mehta tepsetba liasü. Ozüng amertemi mapa meinyakra, sangdong balala nung aitsüba osang metetdaktsüba agi kecha masütsü. Anungji tanü tensa mejungi aliba mapang sorkari ochi obendang magütsütetra, asüngbo Nagaland state ji nisung ayongayonga tepsettetba state ka akümtsü, ta NLSF-isa ashi.