NLSF-i Kohima nung fair election campaign kaogo

Kohima, March 18 (TYO): Nagaland Law Student’s Federation (NLSF)-i March 13 nü Kohima district kübok Nerhepheza yim nung fair election campaign kaogo.
Iba sentong nung NVCO convenor aser ACAUT (legal cell) convenor, Kozhokhoto Savi-i election nung sen amshiba inyakyim ajanga asen Naga lokti raksatsüba indang metetdaktsüba den külemi election merüka agitsü koda tongtibang, iba onük nung jembi.
NLSF Tir, Imliben Lemtur-ia, Nagaland ya nütsüng shilem 99.9 aliba Khristan state ka lir, anungji sensotemi pei nija vote agutsüba dak alaka tangar melen vote magütsütsüla aser booth tashiyim agi magitsüla, ta ashi.
Laisa yimdaklirtem dang, election mapang nunga sen aser tashiyim mamshiba ajanga Khristan ama alitsü ajungshi.
NLSF tatong Tir, Ywang-ia, ochimashi ajak atema teraji election lir, anungji ibaji anema inyaktsü mapang tongogo, ta ashi.
Yimdaklirtemia NLSF mapa tajung atema tepela lemsatepba den külemi parnokisa, mapang shia parnoki election junga merüka agitsü campaign osangbo angashir, ajisüaka par yimtsüng nungbo iba sentong kodanga makai liasü, ta ashi.
Iba campaign nung village council chairman, secretary, Pastor aser lanur lenirtemi tejangraba tulu nung shilem agiba den külemi lokti ajungtsü atema iba sentong ya district tesem ajak nung kadaktsüner, ta mepishia metetdaktsü.