NLSF-i Nagaland nung Govt. Law College amenoktsü akhanger

Nagaland nung Govt. Law College amenoktsü asoshi NLSF-i ayongzüka sorkar dang takhangba agüja longkak aitba sentong nung MLCSU den AKM-ia nungita shilem agiba mapang tangokba noksa nung angur. Mokokchung, July 07, 2016.

Mokokchung, July 7 (TYO): State sorkar dang Nagaland nung Government Law College amenoktsü asoshi takhangba agüja Brihostibarnü Nagaland Law Students’ Federation-i ayongzüka Mokokchung, Kohima aser Dimapur nung mener longkak aitba sentong ka liogo. Iba sentong timtem kecha melii tesünep nung tembanga liasü.
Kasa sentongji Mokokchung nunga Mokokchung Law College Students’ Union (MLCSU)-i ayongzüka yangi Mokokchung Town Hall nung takok ngua liogo. Sentong nung kaketshirtemi shitipaktem nung o  balala zülur longkak aita liasü.
Tanü sentong tongmelang ka agidang, MLCSU tir C. Talimoa-i jembidang, iba longkak aitba sentong ya taoba NLSF 3rd Assembly May 31, 2016 anogo nung renemba maparen ka lir, aser ibai tongtibangsa state nung Govt. Law College amenoktsü asoshi sorkar dang takhangba agüja longkak aittsü nükjidong nung ayongzükba lir, ta metetdaktsü.
Paisa ashiba agi, tanü tashi state nung Govt. Law College kata maliba ajanga law kaketshirtem lenmang aisü nung timtem ajuruba kuli kar lemsatep.
State nung Govt. Law College maliba ajanga Nagaland University (NU) nunga law department temeja lapoka mali. Iba den ano state sorkari law azünger kaketshirtem kanga sentoker, ta paisa mepelaba olen ka ashi. ‘Asenoka tangar amaji state nung Govt. Law College akatsü temeten lir’, ta paisa ashi.
Nagaland statehood ngur küm 52 ajunger, saka tanü tashi Govt. Law College kata mali. Anungji, “state nung Govt. Law College amenoktsü onoki akhanger aser Indian temzüng Arrla 30-i melaba ama inyaktsüla,” ta tirisa metetdaktsü.
State nung Govt. Law College amenoktsü atema khuret süa bilema Ao Kaketshir Mungdang-i maparen ajak nung nungitba asoshi parnok danga pelaba olen ka MLCSU tirisa metetdaktsü.
Tanü iba sentong nung AKM Repsem Zülur, Shilu-ia mapang tatsüka agia jembidang, state nung Govt. Law College amenoktsü akhangba maparen nungji AKM-ia khuret süa bilemer aser iba dak sentakba nung tatem tashi nungittsü, ta metetdaktsü.
Mokokchung Law College ya 1981 nungi tenzüka yangi nungi kaketshir tajung aika adokdagi. District nung Law College ka akatsü tim ta ajiteta Mokokchung district nüburtemi tenla tulu agüja Mokokchung Law college ya tenzük, ta paisa otsüren kar ashi.
Mapang shia AKM-i Mokokchung Law College ya sorkari agitsüla, ta shia arudar. 2014 nunga AKM-i sorkar dang iba dak sentakba nung takhangba ka agütsüogo, ajisüaka tanü tashi mapa mekümteti lir, ta paisa ashi. “State sorkari nübur taginübaji tongtsütsüla,” ta paisa shisem.
NLSF Speaker Nungshimeren-ia tanü longkak aitba nükjidong kar lemsatepba den külemi State nung Govt. Law College amenoktsü asoshi NLSF-i mapang shia sorkar dang nenshia arudar, aji oda state sorkaria onoki akhangbaji amajok mesüdaktsütsü imlar, ta ashi.