NMA-i municipal elections agitsü akanger

Kohima, April 11 (TYO): Nagaland nung municipal council nung tetsürtem nem menden balaka shiteta yutsütsü asoshi Naga Mothers’ Association (NMA) tenüng nung Supreme Court nung ken o benokba angadanger külen, Supreme court nung obendangeri April 5, 2016 nü tu tetsürtemi aginüba ama parnok metenja obendang agütsüogo, anungji municipal election yakta agitsüla, ta NMA tir Wt. Abeiu Meru aser Advisor, Rosemary Dzuvichu nati metetdaktsüogo.
Tenatisa ashiba agi, April 5 nü Supreme Court nung obendanger, Justice A. K. Goswami-i obendang agütsüba ajanga tamalen municipal election magitsü atema obendang agüja aliba agientsüogo aser tetsürtem nem Nagaland Municipal First Amendment Act nung lateta aliba ama, menden balaka shiteta yutsür külen municipal election agitsüla ta obendang agütsüogo.
Yakanü, April 9 nü NMA lenirtemi Nagaland Chief Minister aser Chief Electoral Officer, Nagaland na dangi züluba shidi nung, April 5 nü Supreme court-i obendang agütsüba nung ajemdaker  tekaratiba nung municipal elections agitsüla ta takangba agütsüogo.
Iba kasa onük aser maparen indang jembitsü atema yakta  “Joint Action Committee on Women Reservation” telok senden ka alitsü ta NMA lenirtemisa metetdaktsü.