NMA-i Nagaland sorkar dang AFSPA agientsü mepishir

Dimapur, July 2, 2021 (TYO): Naga Mothers’ Association (NMA)-i state sorkar dang Armed Forces Special Powers Act (AFSPA) agientsü atema mepishiogo.

“Nagaland nung AFSPA maneni benokba atema tebilemtsü abener aser Naga nunger tarutsü atema yimjung aginüra iba Act agientsüla. State sorkari iba tashiyim ozüng odang benokdaktsüba atema khuret abener” ta NMA-i Chief Minister Neiphiu Rio dangi shidi züluogo.

“Tang Nagaland nung Naga yimten teloktem tsüngda rara mali aser nisungtemi Naga accord sign asütsü atema yongya ataba mapang ka nung iba Act atsülangtsü nüngdak madoker” ta NMA president Abei-Ü Meru aser joint secretary Malsawmthangi Leyri nati shidi nung ashi.

“Tesüiba kümtem iba tashiyim ozüng ajanga Naga nunger nem timtem bentsür aruba aser tekangshi ajurubatem India sorkari mebilemtsür. Army-i tashiyim mapa inyakba ajanga tetsür aser tanurtem densema nisungtemi timtem balala ajuruogo. Mitkar tashi amshiba aser taila khatepba ajanga tapayutsü taküm aika samaogo” ta NMA-isa ashi.

“Nübortemi shimtetba lennirtem ama iba Act kübok asenoki timtema aruba putiotsü asoshi bilemtsü imlar. Nagaland nütsüng yongsük nung tetsür tesadang ka jungnüa lir anungji AFSPA ya matsülangi agientsüla” ta parnokisa metetdaktsü.

“Nagaland nung AFSPA maneni atsülangba ajanga temolung melemtep talila adoker aser State police force tashimait kümdaktsür. Tashiyim agi senotsü meshiba aser tanga ozüng alema mapatem State police kübok lir ta AFSPA ajanga ashir anungji iba Act ya joko matsülangtsüla” ta NMA-isa Chief Minister dang ashi.

“Naga putiotsü atema kanga dang tongtipang mapang ka nung chichiba yimjung bener arutsü atema Tsüngremi nü nem shisatsü agüjang ta onoki sarasademer” ta NMA-isa metetdaktsü.