NMSA longkak ait tenzüker

Dimapur, Luroi/August 29 (TYO): Nagaland Medical Students’ Association (NMSA) ajanga Kohima nung aliba Department of Health and Family Welfare kima August 30 nü yimjung nung longkak ait tenzüktsü, ta metetdaktsüogo.

Departmental screening committee ajanga Department of Health and Family Welfare nung contractual posts 280 regular akumba indang sorkari August 18, 2025 nü sangdong agütsüba nung langzüa longkak ya aittsü, ta parnoki ashi.

Iba mera ya nübu shimba yimya aser constitutional provisions nung aibelenba lir aser merit nung ajemdaker nübu shimba yimya samatsür, ta NMSA-i tai tongloktsür.

Iba ama tapi agi telemtetba agiba ajanga state nung public health services lendongi yoker, ta ashi.

Temsüa aliba nübu tem tejangraba wazüka ayutsü atema ozüng nung aliba ama ochishia nübu tetemsü shimtsüla, ta ashi.

NMSA ajanga kaketshir tentet, NGOs, CSOs aser nüburtem dang iba democratic movement nung adentsü ayongzüka liasü.