NNC aser FGN Tirtemi longjemtsü ajungmesor

Dimapur, November 2 (TYO): Naga National Council President, Gen. (Retd) Thinoselie M. Keyho aser Federal Government of Nagaland President, Brig. (Retd) S. Singnya nati külem sangdong ka nung National Government ka tentettsü aser National Leaders shimtsü atema Naga National Workers ajak longjemtsü mepishia metetdaktsü.
“Iba ya meinyak tashi telemtetba tajung ka magitettsü aser asen nübortem maneni timtemtsü. Tanü asenok melongjemtetra, asenok tsüngda telemsa tuluba akümtsü aser telok balala tsüngda mesüra lennirtem majuruteptettsüsa tensa ka ajurutsü meteta mali” ta Ministry of Rali Wali Affairs/MIP, Federal Government of Nagaland (NNC/FGN) sangdong nung shia lir.
Naga nunger longjemtsübaji Tsüngremi mulungba ka lir aser asen nübortemia ibaji atalokdaktsünür. Asenok kati ka nem tatok magütsütetra, meputeptetra aser melongjemtetra, asenok indang alizüngji pungmang ka ama dang asütsü, ta tenatisa ashi.
Anungji, asenoki ajak madak asen Linük indang alizüng aser taginüba tama südaktsüdi aser asenok tsüngda tangatetba balala alibaji angatetteper asen linük asoshi longjemdi, ta Gen. (Retd) Thinoselie M. Keyho aser Brig. (Retd) S. Singnya nati ayongzük.