NNC aser Naga nunger noktakdak

~  L. Repa Lkr., Midan Peyu Ao Region.

NNC, yimden yimli maparen nung telok ka dang masü (Party), ibai yimsüsüba sorkar-a (government) masü, ibai Naga nunger asoshi tatembangba sobaliba ozüng aser nübor temeten ketdangsüba tentet lir. (Institution). Aji asünung Naga nunger sensoi NNC den külemi ketdangsütsü mapatem nung teinyaktsü lir.
1946, Feb 2 nung tanga sabang ajak madak Naga nunger ajak külemi sabang ka nung longjemtsü tentet. Aji oda Naga nunger nüngdak asoshi NNC-i jembir. 1947 May ita nung India nunger constituent assembly nungi teshimtet nübor arua NNC den ajurutepa India den ka küma alitsü mepishi, saka NNC-i magizük. Ajisür 1947 June ita India teshimtet puri küm 10 (ter) atema tenangzüktepa yanglua agütsü. NNC-i kar melenshir agizük, saka India nungeri Iba tezüngzüktepba NNC den yangluba raksa. British nungeri India nem nüchiso tashi ano magütsüdang Naga nungeri 1947, 14th August nung Naga nüchiso sangdong, India nunger dang nungi anogo ka agi tama Naga nüchiso aso.
A.Z. Phizo 1950 NNC President kümli nungi NNC-i teinyaktsü inyaka Naga nunger shiai Naga nunger yimten tebilemtsü khuret rateta shia, Naga kin telok (tribe) ajak longjemba agi Naga kin (Naga Nation) akümba rajemdaktsü. Iba sülen tangateter tashir kari dang Naga nüchiso indang jembiba agi makoktsü. Anungji Naga senso ajaki mulongba sayutsü atema temeyong anemba (plebiscite), May 16, 1951 nung agi. India kübok masü saka Naga nüchiso nung alitsü ta 99.9 percent agi Federal Govt. of Nagaland March 22, 1956 nung tenzük.
Tashishitsü kecha maliba Naga nunger temetenji Naga nunger India nunger masü aser Nagalandji India lima masü. Temeten ajak agi Naga nungerji kin ka lir. Anungji NNCji Naga nunger tekümdanger aser Naga yimden asoshi ketdangsü kibur.
Naga nungri Naga nunger nokdakba mapa atema mangateti malitsüla.
‘Urr Uvie’ -asen lima asen meyong.

YIMJAK MANUNG AO SENDEN DANGI ZULUR (OPEN LETTER TO AO SENDEN)
Teti akümtsübua aliba asen Aor takutet Ao Senden nung ketangpurtem dangi salem osang ni Wb. R. Toshi Longkumer ajanga lemsateper.
Kü tebilemba ka yamai shidanger. Akhidang asen Aor lenir shisatakar nendaka Aor atema bilemerrtemi asen Aor enti Salang ka akatsü kanga nüngdak ta bilema AO MUNGDANG ta tenüng jateter yim yim shia nung iba mongdang liyongasa aru. Iba mapang nung iba mongdang jagi tamangba yimsü nung kecha tebendang mekai longsulungsua adenshia iba Mongtang Meraketa liyonga aruya liasu, saka asen Aor rongnung par laishir samanirtemi iba mongdang ya Tamangba yimsü ajak nungi masü saka Baptist mongdang ka tang kumdi ta sür 1960’s tom ka nungi iba mongdang dang ya AO BAPTIST AROGO MUNGDANG ta tenung melen, koba mongdang nung Baptist amangertemang adentsü akok. Iba dangji ABAM ta tenüng jateta iba mongdang tenzük. Saka AO MUNGDANG (AM) tobosa alinungang jungla sur nung joko AM to agi (A.S) Ao Senten ta ang tenüng tilabai alua Ao Senden ta tenüng melenshir tanü tashi Ao Senden ta dang amshia arur.
Anungji asen Aor tashirtemetetertemi iba ana ya koba (A.M) mesüra (A.S) tetezü tuluba aser taretba aser teputepba aji ken shisadang nungbo kangasa jungla na (?) ta aiben kü molung nungsa shisadanga aliba tanü iba o ya yimjak nung shidanger.
Niang medokmeperi alitsüa akok, anungji meshitakra niang meyiba agidi.
                                         – R. Toshi Longkumer, Dimapur.