NNC (NA) tenüng amshirtem den amalitep malitsüla: GPRN

Dimapur, Rongchii/April 25 (TYO): 2016 küm October 30 nü President, Khumcho Chilimong aser Ato Kilonser, Hangping Zeliang na leniba nung NNC (Non-Accordist)-i NSCN nung adentsü atema official süa anena liasü; parnoki civil aser military wing naprong nungi züngsem tenüng 119 bener CHQ, Hebron-i aru, ta tanü GPRN MIP sangdong ka ajanga metetdaktsü.
NSCN nung adentsü atema arurtem rongnung Home Kilonser, Finance Kilonser, Defense Kilonser aser MIP Kilonser den tanga Kilonser 23, Deputy Kilonser 11, Tatars 18, Secretary pezü, Additional Secretary asem, Joint Secretary ka, Deputy Secretary pezü, Under Secretary pezü, Leacy 22, Razou Peyu 9, Colonel ka, Lieutenant Colonel ana, Major pongu, Lieutenant ana, 2nd Lieutenant asem aser kabo designation maliasü.
“Ajisüaka iba telok den kecha tesendaktep maliba par züngsem kari NNC (Non-Accordist) tenüng amer maneni inyaker ta osang angashia mepelar. Ibaji ajanga onoki Naga nunger dang aser public dang NNC (Non-Accordist) tenüng amshir shinga den amalitepa malitsü atema sangdongtsüsa akümer. Parnokji tanga kecha masü saka lokti anema inyakertem mesüka lir,” ta kasa sangdong nung shia lir.
“Naga nunger yimtenren temeden atema Nagalim asoshi raraba nung joko NNC (Non-Accordist) mali, kechiyong parnoki NSCN den longjemogo,” ta MIP sangdong nungsa shia lir.