NNC Otsü

Naga nunger yimten tebilemtsü tatem küma latettsüba mapang anasai arur ama alidang, tang ano Naga National Council (NNC) tir Watsü Adinno Phizo-i NNC tenzükba anogomong bilemteta amongbaji Naga nunger asoshi osang tejen ka nenshir asütsü. NNC teloksa süaka Adinnoi aniba NNC telok yabo tang India den Naga yimten ken o jembiba nung shilem magir. Atangji, akhi NNC ama masü saka tangbo NNC agi telok asem pezü lemsar alinungji, kanga tashimait kümogo. Ajisüaka, Naga nunger yimten nüchiso angutsüla, kechiyong Naga nungertem ya India nunger masü ta nokdakba telokji Adinnoi aniba NNC telok ya ka asütsü. Atangji, tanü putu nung parnoki nokdakbajiang shitak asü mesüra tang India government den Naga yimten ken o benoka jembir teloktemjiang shitak asütsüar mapangi dang ashitsü. Naga nungertem dak tangar yimten kübok melii pei lima nung pei yimsüsüba kübok alitsü tangatetba yabo Tsüngremi tamasayongi enokja liasü. Ibayongji, Naga kin mesüra Naga nunger ta metettepa tanü ama Naga kin ajak longjema malidangyongi, Naga nunger yimtsüng shiaji pei süngkümshi kübok pei dang yimsüsüa aru. Iba kasa tangatetba nung kodang Naga kin balala nungi ajak kasa Naga nunger ta ajurutepa metetteptsüsa 1918 küm mapang aru, idangji Naga Club tentet aser parnoki 1929 kümbo India nung British yimten dang Naga nungerbo parnoksasa dang yimten lateta yimsü asütsüsa tokjang ta tezüluba nung dena agütsüba tanü asenoki azünger. Iba anogo nungi tenzüker, Naga nungertemi pei yimten temeten indang jembitsü tenzükba tanü tashi manener. 1946 küm February ananü NNC tenzükba otsü ya bushidangra, Naga nunger yimten nung shisatsü aienba kuli yangi angur. 1946 küm ya alima rara tanabuba raraba mapang temli, raraba mapang Kohima nung bomb aser injang agi raksatsüba kiojentema meyanglushiteti aliba mapang ka liasü. Iba rara metenzükdakyongi Naga nungertemi British nungertem dang Naga nungertembo India yimten kübok malitsü ta kuli teperi agüja shiadoker liasü, anungji British nungertemia iba ken o ji temulung nungbo liasü aser Naga nungertemia British nungertemi yimten jenjang balaka agütsür aotsü ta imlaseta liasü. Iba ama mapang ka nung, Kohima nung Deputy Commissioner, Sir Charles R Pawsey-i Naga kin tapu balala nungi tashitemetetter aser taintem kar shimtetter Naga Hills District Tribal Council (NHDTC) ta tenüng agütsür lokti telongjem tentet ka tentet. NHDTC tentetba nükjidongji alima rara nung kiojen raksabatem asadanga itemji yanglushitsü lenmang bushiteptsü aser Naga kin yimten jenjang ya Assam state küboksa süaka jenjang balaka nung alitsüsa jenjang kar latettsübatem liasü. Tebilemba tajung aser sentonga tajung, saka NHDTC nükjidongji 1929 küm Naga Club-i British government nem zülur agütsüba nung shia aliba yimten jenjang dang nungi kanga agi tilaba, anungji Naga nunger lenirtemi ibaji magizüktet. Item Naga nunger lenirtem, talisa A.Z.Phizoi anir, Naga nunger ya Tribe masü saka Nation ta jembi aser British yimten yimsüsürtem nem angatetdaktsütsü merang. Iba tangatetba nung 1946 küm February ananü Wokha nung NHDTC senden alidang, iba tenüngji Naga National Council (NNC) ta melen. Ibaji NNC tenzükba otsü lir. 1946 küm Naga nungertemi onok ya ‘Tribe’ masü saka ‘Nation’ ta angatetbaji tanü putu nung asenok ajak asoshi tangatettsü aser tayongzükba tuluka asütsü. Aji oda, Tribe o Nation na tsüngdaji talangka itepba lir. Ajisüaka, tanü asenokbo India kübok ‘Scheduled Tribe’ akümba agi temulung ser kazür. Aji oda, Nation asütsüba purtem Scheduled Tribe kümer, India kübok election agidang ochi ajak yokmadoker, anogo shia tiyazü ana agi ochi ka yanglutsü merangba purtemji asenok Naga nunger kümogo. Tanüa asenoki asenok ya ‘Tribe’ masü saka ‘Nation’ ta bilema inyakra, India küboksa asüyonga asenok ‘Nation’ balaka amato meraketketa topur junga yanglutettsü.