NNC president Adinno Z Phizo den tanü asüpila sentep sentong agitsü

Dimapur, October 9, 2026 (TYO): Naga nunger lennir Angami Zapu Phizo’er jala tantsüla aser Naga National Council president, Adinno Z Phizo Brihostibar nikongdang alima nungi pilaogo. La arishi küm 94 liasü.

Adinno ya NNC (Adinno) faction president liasü aser la den asüpila sentep sentong asüng, Honibar anepdang 11:00 ako nung ABCC Mission Compound Ground, Kohima nung agitsü.

Asür kibong den asüngdangtepa NNC and FGN-i Naga nungertem onoki meima aliba Adinno Phizo taküm bilemteta aser la tanüla Tsüngrem ket nung agütsüba sentong nung adentsü jaoker ta NNC and Federal Government of Nagaland (FGN)-i metetdaktsüogo.

Asür Adinno den asüpila sentep sentong ya national procession ka agia tenzüktsü aser tembangba sülen Dzüsie,  Khonoma nung la mang aremtsü ta parnokisa ashi.

Iba sentong ya bangdakpurtemi tentetba Naga National Funeral Committee ajanga ketdangsüa agitsü ta parnokisa ashi.

Kohima Chamber of Commerce and Industry (KCCI)-i Honibar anepdang 11:00 ako nungi nikongdang 3:00 ako tashi Kohima nung shishilembadak ajak shibangtsü metetdaktsüogo.

Iba ya asür Adinno den asüpila sentong agidang akhüm tetushi agütsüba sayua amungba asütsü ta KCCC-i ashi.