NNC President inyaktsü atema Gen. (Retd) Thinoselie M. Keyho shim

Kohima, May 11 (TYO): Bodbarnü Phek district kübok National Prayer House, Yoruba yimtsüng nung Naga National Council (NNC) lokti senden amen.
Iba senden nung NNC Search Committee convenor, Zhopra Vero-i osang metetdaktsüdang ashiba agi, April 19, 2016 nü Toulazouma, Dimapur nung NNC pur CEC senden ka amendang züngsem tenet agi akümba search committee ka shima mapa nungloktsü.
Iba luden nung pa convenor sür Thepushuyi S. Keyho, Zapuvisie Lhousa, Senka Ao, T. Oren Lotha, P. Puthai Lam aser T.V. Litsaba Sangtam nungertem züngsem asütsü shima liasü, ta Zhopra Vero-isa ashi.
Luden nem küm 5 (2016-2021) kümsük atema President- 1, vice president- 3, general secretary- 1 post, joint secretary- 3 aser advisor- 1 inyaktsü atema tetemjen nübotem bushitsü mapa nunglokja liasü. Iba asoshi ludeni Naga nunger aliba tesem ajak sema senzü aser nübortem tebilemba meshia sendentem ayongzüka amen.
Tanü lokti senden nung search committee convenor-i, “Luden-i menden ajak atema nübo peria mongutet saka lokti senden nung benoktsü atema President- Gen (Retd) Thinoselie M. Keyho, vice president -Thepushuyi S. Keyho, joint secretary- Bendang Sangtam aser advisor- I. Matong nungertem tenüng teta bener arur,” ta ashi.
Pai osang metetdaktsüba sülen senden nung adenertemi search committee-i bener aruba nübo ajak mulunga agizük aser Vekronu Dozo, Mayam Riyam-i Gen (Retd) Thinoselie M. Keyho aser ketdangpur tasentem tenangzükba agidaktsü.
Gen. (Retd) Thinoselie M. Keyho-i NNC President agizükba sülen o jembidang, search committee ajanga pa nem iba tetushi agütsüba aser teloki pa nübo mulunga agizükba atema pelaba metetdaktsü.
“Asenoki longjemer Naga National Council tim lenmang nung anitsü ta tamang kaa, ni iba menden ajemalua agizüker. Naga National Movement nung nübortemi shimtetba chichiba yimten telok aser Linük rejuji Naga National Council lir. Anungji, Indo-Naga yimten ken o asoshi telatetba ka agitsü sapiji NNC ket nung lir” ta Gen. (Retd) Thinoselie-isa metetdaktsü.
Tanü NNC lokti senden nung adenertemi, “Alima madak Kiburji Tsüngrem lir aser NNC General Meeting 2016 takok ngua agitetba atema Pa nem tenüngsang aser tetushi ajak agütsür,” ta bangzünga ayu.
Tanü senden nungsa 1947 Naga Nüchiso aser May 16, 1951 nü Naga Plebiscite nung maneni masetshii noktaktsü bangzüngtep.
Iba lokti senden takok ngua ayongzükba atema NNC-i Chakhesang Region nem tenüngsang agütsü.
Senden nung Federal Government of Nagaland Kedahge, Brig. (Retd) S. Singnya aser CEC, NNC züngsem Zapuvisie Lhousa natia o tatsütsü jembi.
Senden nung mendenji Senka Ao liasü, Rev. Pukrolhu Lohe-i Lai zünga sarasadem, Prayer Warriors, National Prayer House Yoruba aser Suthozu Nagwu village nungeri ken aten, Rev. Dr. V.K. Nuh-i NNC ketdangpurtem asoshi sarasademtsü aser NNC vice president, Thepushuyi S. Keyho-i anküp tepela o jembi.