NNC tenzüker küm 70 ajungba mong among

Kohima, Feb 2 (TYO) : Naga yimten nüchiso bushir telok rongnung mezüngbuba Naga National Council (NNC) tenzüker küm 70 ajungba mong sentong ka tanü Mongolbar nü Peace Hall, Chedema village nung ayongzüka mongogo.
NNC ya Naga nunger yimten temeten wazüka ayutsü asoshi 1946 küm February 2 nü tenzük. Naga nungertem ya shinga küboka mali asü, anungji 1947 küm August 14 nü Nagaland nüchiso anogo asütsü sangdong, ajisüaka Indiai ibaji magizükba ajanga yimten nüjiso asoshi India den raratsüsa aküm ta NNC lenirtemi metetdaktsü.
Iba sentong nung NNC tir, Adinno Phizo-i jembidang, British nunger aliba mapang Naga nunger lima dang ya Naga Hills ta jaa liasü saka 1947 küm British nunger aodang Naga Hills ya Assam kübok District ka ama yutsü saka ibaji Naga nungertemi magizük ta metetdaktsü.
Iba mapang nungi tenzüka NNC teloki Naga yimten nüchiso asoshi raratsü tenzük ta laisa ashi. Tanü India sorkari India yimten nüchiso asoshi rarartem kinük kisang ajak nungi bushiteta aküm agütsütsü meranger saka Naga nunger yimten nüchiso bushirtembo India sepaitem nem Armed Forces Special Powers Act of 1958 tashi agütsür kangshidaktsür,” ta Adinoisa metetdaktsü.
NNC lenir A. Z. Phizo-i ashiba o ka lepshia metetdaktsü dang; ” Naga National Council ya Naga nunger akhi yimsüsüba yimya nung teimbai mesüra ajaki mulungba nung yimsü asütsüba tangatetba nung amendaka lir. NNC a yimten telok ka masü saka Naga nunger asoshi yimsüsüba menden lir, anungji Naga nunger ajaki NNC asoshi khureta inyaktsüla ” ta laisa metetdaktsü.
Iba kasa senden nung taoba Naga Hoho tir, Wb. Yiesonü Veyie, taoba ABCC tir, Dziesevilie aser Thepfulhouvi Solo nungertemia jembia liasü.