NNC/FGN aser NSF nati Naga Independence Day amung

August 14, 2016 nü TPC Kohima nung NNC President, Adinno Phizo-i 70 buba Nagaland Independence Day nung o jembidang agiba noksa angur.

Kohima, August 14 (TYO) : Transit Peace Camp Kohima nung Federal Government of Nagaland/Naga National Council (FGN/NNC)-i 70 buba Naga Independence Day benjung ayongzüka amung.
Sentong nung NNC president Adinno Phizo-i o jembidang ashiba agi, Naga nungertemi tetsübu kecha melii mapang den liromedema pei temeten atema noktaker aser akhidang nungi Naga nungertemi pei linük kümzüka arur aser tanüa kasa dang lir.
“Naga nungeri yimjung aser putepa linür, saka India-i rara tenzük aser Nagaland nung telemsa adokdaktsü aser yimsü asür. Linük tulu ka indang ‘armed forces’ ajanga linük tila ka meketbanger alibaji tamakoktsü ama saka ibaji asangsang nung India aser Nagaland tsüngda lir,” ta Adinno-i ashi.
“Naga nungeri India (1954-1964) den raradang tetsübutsü tensa ajuruogo aser iba rara ajanga linük ajunga anokshitsü, nisung aika timtem ajuru, aika lemta aser aika asü. Iba anogomung nung asenoki linük atema taküm bendanga agütsürtem bilemteter” ta laisa shisem.
Tesüiba mapang Nagaland ya pei sasa litetba linük ka liasü aser meshimetsürtem maliasü. Nübortemi tepela nung liasü, temulung lemtep aser ochishia liasü. Tanü tensa memesük, tesüiba mapang kin o kin anemtepba maliasü. Ajisüaka, tazüngertemi mapa aser itasen angutsü mechi nung kin o kin tsüngda telemsa adokdaktsü. Asen linük temenen nungi kümzüka alitsü aser akhi ama tensa arudaktsütsübaji Naga nunger ajak indang tebilemtsü khuret lir, ta Adinno-isa ayongzük.
Asenok ajak Yisu Khrista ajanga Tsüngrem dak amangertem lir, anungji asenoki Pai kümzüktsü ta asüba tashi dak temulung melemi melili, kechiyong Pai asenok kümzüktsü aser asen tsükchirtem ket nungi asen Linük kümzüka ayutsü, ta laisa ashi.
Sentong nung FGN Kedahge general (retd) Viyalie Metha-ia o jembidang, “Tesüiba küm 70 tashi Naga nunger India kübok timtema liyonga arur” ta ashi.
“India-i ambangyim mapa inyakba rongnung tawa Naga nunger ajak dang ‘Aadhar card’ ta ajaba India senso kulikaket tashiyim agi agizükdaktsüba ya ka lir. Iba card malirtemi facility balala mangur, ajisüaka iba ya ajanga Naga nunger ka Indian mesüra Mongolian nisung ka Aryan mekümdaktsütettsü,” ta Viyalie Metha-i ashi.
“Tesüiba küm aika telungpur teloktem indang sorkartemi tashiyim agi sen saruba ajanga asen linük nung wara tamajung agi kangshir ama kangshia arur. Item teloktemi India den yimjung tenangzüktep agi saka parnok sasep nung aser nübortem denbo yimjung meyanglutet” ta paisa metetdaktsü.
FGN-i Naga nunger khuret angateta lir aser nübortemi atema bilemja mapa inyaker. Asen litsü rakzükertemi timtem agüjaka onoki itemji ajangtetogo aser asen linük temeten metoktsüi ammeta lir, ta Mehta-isa shisem.
Tanü sentong nung mendenji GFN tatar hoho speaker Lhouvitsü liasü, head chaplain Naga Army Brig. Vephi Dozo-i lai zünga sarasadem aser FGN chaplain-cum-secretary Thihü Khamo-i tembanga sarasadem.