NNC/FGN-i 62 buba Nagaland Republic Day amung

March 22, 2017 nü Transit Peace Camp (TPC) Kohima nung NNC/FGN 62 buba Republic Day amungdang FGN Kedahge-i national salute agiba noksa nung angur. 

Kohima, March 22 (TYO) : Bodbarnü Transit Peace Camp (TPC) Kohima nung Naga National Council/Federal Government of Nagaland (NNC/FGN)-i 62 buba Republic Day mungogo.
Iba sentong nung NNC President Adino Phizo-i anir Naga army aser NNC/FGN ketdangsertem den Naga nunger aika aden.
Sentong nung o jembidang, FGN Kedahge General (Retd.) Viyalie Metha-i tanü tashi Naga linük kümzüka ayuba atema Tsüngrem nem tenüngsang agütsü.
Alima putiotsü nung tanga linüktem dang nungi Naga putiotsü khenyongi balaka lir, kechiyong linük teimbaka lisopur jenjang nungi mesüra yimli ka kübok aliba nungi tanü-asüng republic linük ama aküm. Ajisüaka, Nagaland nungbo, asenok yimtsüng jenjang nung democratic Republic ka nungi tanü-asüng national Democratic Republic ka aküm, ta Viyalie Metha-i ashi.
A.Z. Phizo aser pa den yaritepertem lenisüba kübok Naga putiotsü nung mapang tatsü ka tsüngda aika ajangtetbaji Naga nungertemi ajitettsüla. Akhidang, Naga nungertemji pei pei sasep nungdang sobalibaa liyonga aru, saka alima ainba den liromedema, 1921 küm Naga Club tentet. Iba ya yimtenren telok ka ama masü saka lokti tentet ka ama dang tenzük, ta paisa metetdaktsü.
“Naga nungertemi linük temeten atema nokdaktsüsa mapang ka ajurudang, Naga Club-i Naga nunger tenüng nung mapa inyak aser January 10, 1929 nü Kohima nung British Simon Commission nem mezüngbuba Naga national memorandum agütsü” ta Mehta-isa ashi.
Tanü asenoki 62 buba Republic Day amungdang, asenoki NNC mezüng tenzükertem bilemtettsüla aser parnoki asen linük asoshi mapa tajung inyakba atema tetushi agütsütsü tim. Asen linük yangertsü atema parnoki taküm bendanga agüja tenzük, anungji asenoki parnok bilemteta tushitsüla, ta FGN President-isa shisem.
Nagaland nung yimtsüng rongdoktsübaji April 18, 1955 nü Tuensang Area kübok Huker nungi tenzük, saka March 22, 1956 nü Naga Republic Day amungba sülen nungi Nagaland kübok yimtsüngtem külemi rongdoktsüba tenzük. Yimtsüngtem külemi rongdoktsüba ajanga Naga nunger meyirjang aika arem nung jenoka alitsüsa aküm aser 1956 o 1957 tsüngda Naga nunger aika injang, yatzüra aser tashidak balala ajanga asü, ta paisa metetdaktsü.
Naga nunger yimtsüng 645 den tema mitsü küma rongdoktsü aser küm aika army-i mapa inyakba ajanga alu meyimtet. Ajisüaka, item khuret jenti ajuruaka Tsüngremi asen linük wazüka yutsü aser March 22, 1956 nü Pa tenüng nung meshitet, ta Mehta-isa ashi.
Tanü sentong nung Metha-isa Naga linük wako salatsü. Sentong nung mendenji FGN Killo Kilonser Shevohü Keyho liasü, Khiamniungan Baptist Church Kohima sanüker, Rev. Pamo-i temoatsü meshia sarasadem, Elevation Choir, UBC Kohima o col. Ala & friends nungeri ken aten aser Dziesevilie Kesiezie-i tenüngsang agüja sarasadem.