NNC/FGN züngsem ana mapa nungi anentsür

Dimapur, October 31 (TYO) : Killo (home) Ministry, FGN-i tetuyuba agütsüba nung ajemdaker Ministry of Rali Wali Affairs-i züngsem ana anentsüba osang metetdaktsür, ta sangdong ka nung shia lir.
2013 küm 61 buba Tatar Hoho alidang NNC/FGN Kedahge Brig. (Retd) S. Singnya lenisüba kübok Ino. O. Chingmak Chang, Deputy Kilonser (without portfolio) nem Chang Region nung Midan Peyu tasen ka meshim tashi mapa inyaktsü nungloktsü, ta Ministry of Rali Wali Affairs, Federal Government of Nagaland (NNC/FGN) sangdong nung shia lir.
Kasa kümji Midan Peyu inyaktsü atema Ino. T. Loyem Chang shim ajisüaka Dy. Kilonser Chingmak Chang-i asaa dang Midan Peyu mapa inyakba manen aser ozüngi memelaba ‘Deputy Kilonser cum Supervisor’ indang letter pad amshia arur. Iba atema pa nem aiben kümdangtsü shiogo saka pai Tuensang jila nung office tem, shishilembartem, gari kiburtem nunger dang nungi ozüng alema sen saru. Iba jagi Kedahge, FGN nungi temelaba ngua October 31, 2015 nungi Ino. O. Chingmak Chang linük tenzükba wadang nungi anendaktsütsü telemtetba agi, ta sangdong nungsa metetdaktsü.
Ano, Kedahge, FGN nungi temelaba ngua NNC/FGN kübok Chang Region nung Tatar Ino. C. Lepba Chang October 31, 2015 nungi linük tenzükba wadang nungi anendaktsütsü telemtetba agiogo, ta sangdong nungsa shia lir.
Iba dak sendakba nung osang tejangja metetnürtemi Secretary, Ministry of Killo (Home) Affairs den Mobile No. 9612417005 aser Midan Peyu (Ino. T. Loyem Chang) den Mobile No. 8731976643 ajanga tongteprateptsü akok, ta Ministry of Rali Wali Affairs, Federal Government of Nagaland (NNC/FGN) sangdong nung metetetdaktsü.