NNC/PRN-i agütsüba quit notice aitsür: DVC

Dimapur, December 6 (TYO): Don Bosco Vocational Training Centre, Darogapathar Village, Dimapur nung aliba Rector, Fr. Jose Chacko sdb dang People’s Republic of Nagaland (NNC/PRN)-i December 10, 2017 matongdang Nagaland toktsür aotsü tetuyuba agütsüba angashia kanga aoksar aser süngmanger ta Darogapathar Village Council-i metetdaktsü.
Shitakba agibo NNC/PRN-i ang asen Naga nunger lanur nem shisaliok aser mapa asoshi training agütsüba rejutem kümzüka ayutsüla sernung kodaser taoba Diploma students-i ken o benokba atema NNC/PRN-i quit notice agütsür ta kanga ratar, ta DVC sangdong ka nung shia lir.
Iba Quit Notice ji “Commander-in-chief” (Naga Army)-i agütsü saka iba nung taitsü aketba reprangteter, kechiyong iba nung sign dak alaka nisung tenüng mesüra contact number kecha agüja mali. Anungji, People’s Republic of Nagaland (NNC/PRN) nem tenüng menük bener marutsüdang bangdak ketdangsertemi iba ken o bushisüngdangtsü ayongzüker, ta parnokisa ashi.
Nagaland nung alirtemi teti atema telemtetba tajung ka aginüa alia mapang ka nung aser ano talisa Yisu Khrista asoba benjung amungtsü pelatepba mapang ka nung ‘quit notice’ agütsüba atema kanga sasar aser aitsür, ta DVC-isa metetdaktsü.
Naga loktiliba ajungkettsü aser yaritsü atema lapoka aliba rejutem ajak nem security shitak agüjang ta Darogapathar Village Council-i Administration aser ozüng amertem dang mepishia metetdaktsü.