NNPGs longjemba atema pelar: NTC

Dimapur, February 1 (TYO): Nagaland nung NNPGs longjemtsübaji Naga nungertem taginüba ka lir aser iba amaji küm ana tejaklen Tsüngrem taochi ajanga NNPGs trok sabang ka nung adenshir Working Committee tentetogo, ta Nagaland Tribes Council (NTC)-i ashi.
Tawa Lt. Gen.(Rtd) Khango Konyak-i aniba NSCN/GPRN(K)-i Naga nunger longjemtsü tangatetba nung parnok sasa telemtetba agia Working Committee nung denogo. Iba ajanga tang yimten tebilemtsü atema olemtep tashi aittsü aser Naga nunger longjemtsü aser putepshiba mapa akangshitsü. NSCN/GPRN(K)-i külem NNPGs den yaritepa Working Committee nung adenba ajanga parnok lenisüba tajung jungkai adoka sayuogo, ta NTC-isa metetdaktsü.
Iba telemtetba tajung agiba ajanga ajak densema telemtetba ka agitsü merangba mapa nung teyari tulu angutsü aser iba atema NTC-i NSCN/GPRN(K) pelashishia agizüker.
Anungji, Deputy National Security Adviser aser Interlocutor RN Ravi-i yimten olemtep nung shinga mezüngdok ta jembibaji tiyazü masü, ta NTC-isa ashi.
NNPGs nung züngsemtemi telok ka toktsür tanga nung oa adenba inyakyim kanga bulua inyaker aser iba ya ozüng tesashi ka ajanga azüoktsü ta Working Committee-i lemtetba atema pelar. Naga nungertem NNPGs longjemba sülen longjemer noktaktsü aser sarasadema nungittsü ayongzüker, ta NTC-i metetdaktsü.
India sorkaria tekaratiba nung iba tebilemtsü koktettsü atema mapa inyaktsü ayongzüker, ta parnokisa shisem.