NNPGs WC aser Security Force temi kanga kümdangtsüla

Kohima, Aami (June) 5 (TYO): India security forces aser Working Committee of Naga Nationalist Police Groups (NNPGs) temi Naga yimten olemtep nung khuret bener marutsü atema kanga kümdanga inyaktsüla ta Nagaland Chief Minister Neiphiu Rio-i ashi.
World Environment Day sentong amungdang osangbener den jembidang, yashi state sorkari kanga dang temaba jenjang nung security coordination senden ka menogo, ta Rio-i ashi.
Senden nungji intelligence ketdangsertem, Assam Rifles, CRPF aser Nagaland Police ketdangsertem den State Chief Secretary aser tongti ketdangsertem aden aser Assam Rifles-i ki mita aoba den NNPGs working committee-i olemtep nung madentsü lemtetba onüktem benoka olemtep, ta paisa ashi.
Assam Rifles aser police-i osang tejangja anguba nung ajemdaker inyaker asütsü akok saka telok anapronglai (security forces & working committee)-i kanga dang kümdanga inyaksangshitsüla, kechiyong küm 21 tashi olemtepa aruba onük tulu jakdang onük tilatem maitdaktsütsüla, ta Rio-isa shisem.
“Asenok kanga kümdangtsüla aser telatetbatem sülen anidaktsüla. Olemtep nung timtem bentsür marutsüsa asenoki inyaktsüla. Tang kechi atalokogo ibaji state sorkar ajanga masü saka ceasefire nung aliba teloktem aser paramilitary forces tsüngda adok” ta Nagaland chief minister-isa metetdaktsü.
“Tangatetba tajung alitsü aser working committee-i maneni olemtep nung adentsü imlar, kechiyong parnoki yamaji meinyakra khuret mokoktettsü. Telok anapronglai telemtetba agitsü atema süoki ia bilema inyaktsüla. Iba onük angatetteptsü imlar” ta Rio-isa shisem.