‘No Confidence Motion’ melii Angh-i mapa inyaktsü makok: Dr Shurhozelie

Kohima, July 17 (TYO): Assembly nung pa anema “no confidence motion” benoka mali anungji Angh indang shilem kecha mali, ta Nagaland Chief Minister Dr Shurhozelie-i tanü ashi.
Züngsem 59 aliba Nagaland Assembly nung MLA 43-i lenisüba melentsü atema takhangba agütsür saka tanü Dr Shurhozelie-i State Civil Secretariat nung osangbener den jembidang ashiba agi “ozü telokji tilaba asütsü akok saka onoki office tiptema ketdangsüdar.”
Dr Shurhozelie-isa NPF party pa den lir ta ashi. “Ni anema nokdakba MLA temi parnok teinyaktsü amadokogo saka meta talang nungi menden rakteper aser ibaji tamakoktsü lir. Parnok arutsüla aser onok den sorkar nung adentsüla” ta paisa shisem.
“Ni tang len aniba ministry ajanga sorkar ketdang mesütettsü ta ozüng kecha lateta mali. Parnoki meyipa arura onoki pelashishia agizüktsü, kechiyong parnokji telok toktsür aoertem lir” ta Dr Shurhozelie-i putepshitsüba indang nenshia metetdaktsü.
“Parnoki teti atema Kaziranga nungdang mamungtsü ta ni imlar aser iba jagi party nungi anentsürtem ajak aniok aser parnok rongnung 2016 küm party nungi anentsüba Lok Sabha MP, Neiphiu Rio dena lir” ta paisa ashi.
“Arogotem aser Naga nunger telok balalai aginüba aser mepishiba ama, onok putepshitsü atema lenmang lapoktsü, saka onoki lenmang lapoktsü nung parnoki putepshitsüba mapang tembangogo ta ashi. Anungji, tangbo joko parnoki dang telemtetba ka agitsüla” ta Chief Minister-isa shisem.
Parnok meyipa marura NPF-i 2018 state general election atema candidate tasentem shimtsü renema lir, ta paisa metetdaktsü.
Assembly nung Vote of Confidence magizükba indang olen ka ashidang, “iba mangatettep atema Assembly-i aotsü nüngdak madoker. Assembly nung vote of confidence meshitsü indang telatetba mali saka nisung kari sorkar anema ‘No confidence Motion’ benokba sülen ang Angh-i Assembly jazüktsü akok. Ajisüaka, tangbo ‘No confidence Motion’ benoka mali, anungji Angh indang shilem kecha mali” ta Dr Shurhozelie-i osangbener dang ashi.
“Nisung shingaia ni anema ‘No Confidence Motion’ benoka maliji kodaser ni majority indang kuli sayutsü. Ni anema nokdakba MLA temi Kaziranga nung kanga mungnür. Maparen ajak nung telatetba ka lir aser onoki taruba election atema mapa kar inyaktsü akok” ta paisa shisem.
Iba ama mapang ka nung pai aniba Council of Cabinet Ministers-i President’s Rule alitsü junger ta tebilemba shidangtsü akok ta jembiba osangji tiyazü ta Dr Shurhozelie-isa metetdaktsü.