Nobel Prize agizükertemi Libya o Syria na nung yimjung alitsü ayonger

2015 Nobel Peace Prize agütsütsü asoshi shimba Tunisia lenirtem, Houcine Abassi, Abdessattar Ben Moussa, Fadhel Mafoudh and Wided Bouchamaoui nungeri Tunis yimti nung osangbener den yashi Bodbar nü ajuruba noksa ka yangi angur. (Tunis, December 10)

 Oslo, December 10 (Agencies): 2015 Nobel Peace Prize agütsütsü asoshi shimba Tunisia sensotemi Syria aser Libya na nung tongpang rarartemi par tongpang rarabaren anena yimji yimjung tia bener arutsütsü tayongzükba ka yashi Bodbar nü metetdaktsüogo.

Tunisia’er National Dialogue Quartet (NDQ) ta ajaba Tunisian General Labor Union (UGTT), Tunisian Confederation of Industry, Trade & Handicrafts (UTICA), Tunisian Human Rights League (LTDH) aser Tunisian Order of Lawyers (TOL) nungeri Arab Spring longkak aittsü tenzükdak, Tunisia nung yimjung maparen inyakba ajanga par Tunisia nung democracy yimsüsütsü yimya takok ngua benoka lir.

NDQ-i bendanga agüja inyaka Tunisia nung linük temzüng tasen latetshitsü, nübur ajunga nem tetsükdakba kecha majurui election nung vote agüja shilem agitsü temeten agütsü aser Islamist o tamangba yimsü nung mamenokba yimsüsürtem sentaktepshitsüba ajanga Tunisia nisung kati tashiyim agi yimsü asüba linük ka nungi democracy benshiba linük ka kümdaktsüogo.

2013 küm tentetba NDQ-i par Tunisia nung temelenshi tajung bener arutsüba ajiteta NDQ nem 2015 Nobel Peace sempet agütsütsü asoshi par lenirtem, Houcine Abassi, Abdessattar Ben Moussa, Fadhel Mafoudh and Wided Bouchamaoui nunger tenüng taküm October ita shima lir.

“Middle East ajunga nung yimji yimjung lia terenlok alitsüsa tongpang rarar ajungai par tongpang nung amshitsütsü osettsüset toktsür yimjung bushitsü ajungshir,” ta NDQ-isa ayongzük.

“Tongpang nung amshitsü osettsüset amshiba agi masü saka yimjung atema jembitepba ajanga dang mangatettepbaren ajunga bentettettsü. Anungji, Syria aser Libya naprongla indang mangatettep ken o ji tongpang osettsüset amshiba ajanga masü saka jembitepba ajanga ang bentettettsü,” ta LTDH nung Tir, Moussa-i yashi sangoktsü.

“NDQ-i ozü Tunisia nung temelenshi tajung bener arutsüba ama tanüngba alima linüktemia yimjung sentong aser maparen inyakba ajanga yimjung aser temelenshi tajung bener arutsütettsü,” ta UGTT Secretary General, Abassi-ia metetdaktsü.