Nodal Officer den state ketdangsertem senden amen

Dimapur, Metsüremi/March 23 (TYO): CODIV-19 tashidak nokdangtsü asoshi Nagaland sorkari jenjang agiba lepa reprangshiba senden ka Nagaland Nodal Officer Sanjay Kumar, IAS den March 23 nü Secretariat Conference Hall, Kohima nung menogo. Sanjay Kumar ya Nagaland nung inyakyim achaayangtsü asoshi Government of India-i shimba lir.
Sanjay Kumar-i ashiba agi, India sorkari iba tensa kanga süoki ia agidar aser linük nung COVID-19 pokteta aliba nokdangtsü asoshi takokba tashi jenjang tapet agidar. Paisa, linük tang tensa tamajung ka ajanga aoba mapang ka lir ta shia Nagaland sorkar dang kechi tia ajurudir ajuruaka renema atatsü aser Ministry of Health & Family Welfare, GoI-i tuyuba sülen tashi angaa anidaktsü ashi. Paisa, Nodal Officer ka ama pai COVID-19 achaayangba nung centre aser state sorkar na tsüngda apulatsür ka ama inyaktsü ta ashi.
Senden nung Chief Secretary, Temjen Toy, IAS-i, India sorkar tetuyuba sülen anidakba aser iba tashidak nokdangtsü saoshi jenjang agiba state tem rongnung Nagaland-a mezüngpur lir aser state sorkari tensa kanga junga asadanga arudar, ta ashi.
Pai, state sorkari tashidak nokdangtsü asoshi jenjang agibatem indang Nodal Officer nem metetdakja liasü. Toy-i, state sorkari PPE, ventilators aser tanga medical equipments tem tali bener arutsü asoshi order süogo ta ashiba den Nodal Officer dang item osettsüttem mapa shidak nung tonga bener arutsü asoshi teyari agütsütsü mepeshi.
Senden nung kaketshirtem aika state balala nungi kidangi meyipa aruba tebilemtsü benoka sensaksemogo aser parnoki peisasa quarantine asütsü tuyuba sülen manidakba aser COVID-19 Helplines tem den tongtepratep masüba tebilemtsü sensaksemogo. Iba ajanga ketdangsertem kanga shisabulua bilemer. Chief Secretary-i ashiba agi, tetuyuba sülen manidakra state sorkari Epidemic Diseases Act 1897 kübok compulsory quarantine inyakyim benoka inyaktsüsa akümtsü.
Temjen Toy-isa, totzü aser LPG densema tenüngdakba oset-tsüset agi Nagaland anünga mali ta ashi, kechiyong tenüngdakba oset belenba garitem nem tenokdangba agütsür mali. Paisa, shishilembadak hand sanitizers tali meyokteper ayokba tebilemtsü lemsatepogo aser District Administration dang iba amala oset kümdanga meit atatsü metetdaktsüogo.