Nok agi prangpong melen

Naga nungertem ya mangko (tekolak) bushiba kin ka liasü ta jembir, kechiyong asenok o asenok na tsüngda lepteptsüngtepa aru aser tangar indang kolak lepzüka bener arubaji konang liasü. Iba ama nok nü amshia lepteptsüngtepba mapang asenok tia ajung British nungertemi yimten ozüng takang bener arua nokdang aser America nungertemi Yisu Khrista temeim osang tajung bener arua asenok kümzük. Iba amaji ka masü nungbo tanü asenok Naga nungertem ya koba ama tia ka nung lilar na (?) ta kanga shisabolua bilemtsüsa tia ka nung asenok liasü. Aji oda, Naga lima nungi British nungertema ao aser America nungertema ao saka asenok yimjung nung litettsüsa Yisu Khrista temeim yimsü tajung agi Naga lima asüng. Iba denji ano Naga yimten nüchiso angutsüba temeten indang jembiba agi Naga nunger longjemdaktsü. Ano, külen India sorkar ozüng tesashi liasü. Item taochi, tangatetba aser ozüng agi Naga nunger kin o kin na aser yim o yim na nok nü amshia lepteptsüngtepa aliba tetsükchitep mapatem  zep ta anen aser Naga lima renloktsü tenzük. Joko, tsükchitepa aliba kintem aser yimtem rongnung yimjung yanglu aser yimtsüng ajak nung school lapok aser arogo tenzük. Item school aser arogotemji tanübo tain kümer jubilee amongba osang angashir. Ajisüaka, tejashitsü kaji tang tashi asenok o asenok na tsüngda kin kidong aser ali arr-ayang otsü agi meputep adoka azü tokshiba, ak chitepba aser okadak o katepba mapatem agi asenok akhi limapurtem jenjang dang nungi tamajungba kümogo. Talisa ano Nagaland anüdoklen alir kintem rongnung mapang shia mangatettep aser meputep adoka azü tokshiba osang angashidang asenok yimten aser arogo teinyaktsü khuret tulu anendaka lir ta bilemer. Atangji, Naga yimten nüchiso onük nung tangatetba balala küma telok balala aika adokba ajanga Naga nunger tali meputep shisangogo aser azüa kanga tokshiogo. Ajisüaka, ibajia shisabolu aser tebilemtsü balaka, anungji khureta balaka lir. Iba dang nung jagi tebilemtsü tulubaji Naga yimten nung linük tenzükertem masü saka tai maketba nübortem mesüra nisungtem kecha kuli tejangja ka maka prangpong agi khasetba tashiyim mapatem ya asütsü. Aji oda, taoba Honibar aonung Shamator o Kiphire na tsüngda kinungbo o kinungtsü na külemi gari nung ooya aliba mapang khasetba mapa jagi asenok ajak nem shisabulu talila ka bendenloktsüogo. Telong nung alir telok o telok na mesüra sepaitem o sepaitem na katepba mesüra khasettepba otsü aser maparentemji balaka, saka tai maketba nisung kasetba aser taia aliyonga nisungi nisung khasetba mapa yabo nübortem ajak asoshi lendong aketba mapa asütsü. Iba ama lendong mapa ya yimten aser arogoi  menokdangteti tim sobaliba ka tenzük ama odaktsüra, asenok limapur asüba mapang nok-nü amshia lepteptsüngtepba sobaliba nungi prangpong injang amshia azü tokshiba sobaliba tasen ka agi melener asütsü. Aji oda, tanü Nagaland anüdoklen aser anülulen kecha kuli tejangja ka mali aser shirnoki inyakar teloka tejangja ka mali azü tokshiba mapa inyakba yagi Nagaland nung yimten aser arogo tashi maitba kuli sayur. Iba ama tensa mapang ka nung ya yimteni ozüng shitak amshitettsüla aser arogoi amangba purtem dang Laishiba nungi temeim, yimjung aser taitoktepba lenmang tejangja sayua tangatetba agütsütsüla. Asenok rongnung rara manener, kati ka taküm samatsütsü mapayur, auyatsü aser ochimashi mapa inyaktsü maaker, nüktapangtatsü marendaker, achiajem nung mazüoktetter, temeim mesayutetter aser tai medoktetter ta  lira, asenokji limapurtem dang nungi tamajungba asütsü. Naga lima nungbo yimten ozünga mali ama ozüng amertemi ozüng raksar tsübur aser arogo nungertemi limapurtem dang nungi tamajungba litetter ta süra, asenok Jubilee mongtepba mapatem ajak ya amajok asütsü. Asenoki meteta aser memeteti Naga lima ya mashimashi ka küma odagi. Joko ozüng agi masü tashiyim agi yimsü asür aser Laishibai masü saka alima rongsen agi arogo anir. Ibai asenok ajak asoshi lendong aketba mapang ka lir. Iba lendong nung asenok mesamanüra asenok metsübutepi tesünep aser tepela nung külemi litettsüsa asenoki asen lima ya tangatetba aser ochi agi tasen küma yanglushitsü tim.