Nokia 3310 online nung sen 3,899 agi angutsü

April 26, 2017 (Agencies): Nokia 3310 phone ya OnlyMobiles nung sen 3,899 agi ayoktsü asoshi bendenloka lir aser May 17 nungi ayok tenzüktsü. May 5 nungi tenzüka iba phone alinertemi jelia mekaa yutettsü.
Nokia 3310 ya Austria aser Germany nung April 28 nungi tenzüka ayok tenzüktsü. Iba phone India nung taruba ita nungi angutsü imlar, saka Nokia company ajanga osang tejangjabo tang tashi agüja mali.
HMD Global ajanga Nokia 3310 ya taküm February ita Barcelona nung Mobile World Congress amongdang sayaa liasü. Kangadang nüngtugu phone Nokia 3310 yanglushir adokba nung maneni ‘Snake game’ dena lir.
Classic Nokia 3310 phone ya jenjang temaba nung ajungketogo saka iba phone ya maneni ‘feature phone’ dang asütsü koba nung battery tashi ajanga ‘stand-by’ nung ita ka tashi taküm litettsü.
Nokia 3310, 2017 edition tereprangtsü ya tejenba phone den mesükteper saka iba phone tasenba ya colour nung, screen tuluba aser tesülen camera keta lir aser tejenba phone dang nungi tapuba lir.
Alima ajunga nung Nokia branded phone tem design süa ayoktsüba den külemi Nokia Corporation-i yanglutetba technology ajak amshitettsü asoshi HMD Global ket nung licence lir. Nokia 3310 tasenba nung 1200mAh battery keta lir aser iba battery ya agizüktsü akoker.
Iba phone ya sentsü tapu 4 nung angutsü- temerem, wakong, anüng sentsü tamang aser aut sentsü nung angutsü.