Manila, July 23, 2016 : Finnish telecommunications tettsüti Nokia company-i taküm küm tatem tashi nung Android 7.0 Nougat smartphone ana yanglua tanaben market nung shilem agitsü renema lir, ta Honibarnü osangbenertemi metetdaktsü.
Ano tenüng magütsüi aliba smartphone ana ya Samsung Galaxy S7 smartphone ama phone telungi tzü maila phone ka asütsü, ta osangbener kati ashi.
Item smartphone nung 5.2-inch aser 5.5-inch QHD screen tem den fingerprint scanner aser tanga phone tem nung aliba camera tem dang nungi tajungba inoktsütsü akok, ta kasa osang ajangasa ashi.
Smartphone anaprongla nung split-screen mode den game asayatsü atema temelenshi tajung kar angutsü. Item temelenshi ya Vulkan API ajanga lir aser iba kasa teyari ajanga 3D Touch-like technology dena inoksentsütsü akok.
Tang mapang tatsüka menokdakteti aliba company, Nokia-i, Nokia phone aser tablet tem yanglutsü atema Finland nung amena aliba HMD company nem taküm May ita nung license agütsüogo, ta metetdaktsü.
Microsoft-i küm ana tejakdang Nokia phone business sen billion dollar 7.2 agi alizükba sülen yaküm parnoki Nokia phone yangluba shibang dang mapa inyaker nisung 7,800 tashi mapa nungi anendaktsü.
Microsoft-i agir külen yangluba Lumia aser Windows Phone tem ajanga bilemba ama tajangzük bener marutsü. Nokia tenüng nung Windows Phone tem agi tajangzük bener marutsüba ajanga Microsoft-i sentong balaka yanglu asütsü südi, ta osang ajangasa ashi.
Nokia Corporation, NOKAI ya Finnish multinational communications & information technology company ka lir. Iba company ya Fredrik Idestam aser Leo Mechelin nati 1865 küm ngutetba lir. Tang Nokia headquarter ya Espoo, Uusimaa, Helsinki metropolitan tesem nung amenoka lir.
Tang Nokia nung Chief Executive Officer (CEO) ji Singapore nungi Rajeev Suri lir.
You must be logged in to post a comment Login