Nokia smartphone shishilembaba nung India-i tongti shilem agitsü

February 28, 2017 (Agencies): Alima nung phone tematiba jenjang asem rongnung Nokia densemtsü asoshi India-i maneni tongti shilem agitsü, ta Nokia company nung ketdangser kati ashi.
Nokia company ya mezüngbo alima nung phone yanglur rongnung jenjang temaba nung liasü aser iba company ya tangbo HMD Global ajanga alizükogo.
2017 Mobile World Congress (MWC), Barcelona nung aliba mapang HMD Global ajanga Nokia 6, Nokia 5, Nokia 3 aser nisung aikati kanga sabua amshiba Nokia 3310 tasenba küma yanglushir saya.
“Alima ajunga nung item phone ya June tashi nung angutsü aser India iba shishilembaba nung tongti shilem tanaben agitsü,” ta HMD Global India Ltd nung tatong tir, Ajey Mehta-i ashi.
“Iba phone shishilembaba ya India nung offline nung timba aotsü saka nisung timbai metettsü asoshi online nunga ayoktsü sentong lir, saka offline aser online nung jenjang balala asütsü,” ta paisa ashi.
Sriperumbudur, Tamil Nadu nung aliba Nokia factory ya alima nung mobile phone yanglur factory tulu rongnung ka lir.
Nokia 6 nung full-HD screen inch 5.5 lir aser ‘matte black’, ‘silver’, ‘tempered blue’ aser ‘copper’ sentsü nung angutsü.
Nokia 5 smartphone indang display ya ‘Corning Gorilla Glass’ indang 5.2-inch IPS HD display lir aser Qualcomm Sanpdragon 430 mobile platform, Qualcomm Adreno 505 graphics processor keta lir.
Nokia 3310 ajanga ‘talk time’ ghonda 22 tashi agütsütsü aser ‘stand-by’ nung ita ka junga battery ken charge asüba ajanga tashi agütsütsü. Iba phone ya sen 4,000 dang tajemba nung angutsü.