Noklak district tentetogo

Kohima, December 21 (TYO): Nagaland sorkari Noklak sub-division nem district jenjang agütsüogo; joko Noklak ya Nagaland nung district 12buba asütsü, aser jurisdiction ji Tuensang district kübok taoba mapang Noklak sub-division asütsü. Noklak ya state yimtiba, Kohima nungi kilometer 300 dak tema pilar lir aser iba district nung Khiamniungan nunger timba lir.
Nagaland Home Commissioner, Abhishek Singh, IAS-i sangdong ka ajanga, “Nagaland Angh-i tepela nung Noklak sub-division agi district jenjang ajungkettsüogo,” ta metetdaktsü.
Yashi Kohima nung State Cabinet senden ka amendang Noklak nem district jenjang agütsütsü atema lemteta liasü, ajisüaka tanü ang official süa sangdonger.
2004 küm nungi tenzüka Tuensang district nungi district tasen tenteta aoba district tasembubaji Noklak asütsü. Tamalen Tuensang district nungi Kiphire aser Longleng districts tenteta liasü. Ano NPF-i aniba DAN sorkar yimsüsüba küm 15 tsüngda district tasen tentetba pezübubaji Noklak asütsü.